List að vera leigjandi

„Listin felst í því að gera annarra manna hús að heimili sínu en þetta er þriðja íbúðin sem við búum í síðan við fluttum út,“ segir Rakel Hinriksdóttir en hún býr ásamt Jóni Þorsteini Reynissyni á Vester­bro í Kaupmannahöfn.

Þar hafa þau búið síðustu fjögur árin frá því að Jón hóf nám í Konunglega tónlistarskólanum. Rakel er grafískur hönnuður og vinnur á lítilli hönnunarstofu, Monokrom. Fyrir einu og hálfu ári kom sonur þeirra Úlfur Már í heiminn. „Hann er því algjör Dani enn sem komið er,“ segir Rakel, sem kann afar vel við sig í borginni.

Hvernig er hverfið? „Vesterbro er ofsalega vinalegt hverfi og spennandi. Ég þarf bara að hjóla 250 metra í vinnuna, en fer samt fram hjá kebabbúllu, bódegu, bókaútgáfu, pólitískri bókabúð, hjólaverkstæði, leikhúsi, tveimur matvörubúðum, rakarastofu, beyglusjoppu og öryggishurða­sölu.

Um helgar reynum við að fara út, það er alltaf eitthvað um að vera einhvers staðar. Ég er frekar sjúk í flóamarkaði til dæmis. Við förum svo yfirleitt með Úlf á einn af leikvöllunum í grenndinni eða leyfum honum að eltast við dúfur í almenningsgarði.

Hvernig myndirðu lýsa stílnum á heimilinu? „Hippastíll væri ekkert langt frá hinu sanna. Ég vil hafa liti, kontrasta og alls konar ólíka hluti í bland. Ég er líka hrifin af viðarlitum og vil hafa viðarhúsgögn í bland við hvítt og ljóst. Ég hef mjög gaman af því að föndra eitthvað og hengja upp. Núna eru það hangandi spottar sem ég límdi hringi á og skreytti hurðirnar með. Áður var það stór veggmynd sem ég bjó til úr spilastokkum. Sem betur fer er Jón mjög skilningsríkur og kvartar lítið sem ekkert, blessaður.“

Ég er mikil myndamanneskja og vil til dæmis hafa myndir af fólkinu mínu uppi við. Stofan er í miklu uppáhaldi. Það er hátt til lofts en húsið er frá því rétt um 1920. Uppáhaldshluturinn minn er Bang&Olufsen plötuspilari frá 1988 sem ég fann hálflemstraðan á flóamarkaði og lét laga. Hann er einstaklega fallegur og hljóðið er ekta. Ég á mikið af plötum og finnst fátt betra en að smella einni góðri á fóninn.“

Hver er sagan á bak við veggspjöldin? „Hugmyndin að plakötunum kom þegar ég var langt komin með fæðingarorlof og var farið að lengja eftir því að skapa eitthvað. Mig langaði að prófa mig áfram með geómetrísk form í nokkur plaköt á mína eigin veggi, og byrjaði á því að búa til úlf, bætti svo við lunda, snæuglu og heiðlóu. Verkefnið vatt upp á sig og fékk nafnið Undra. Nú hef ég gert 17 mismunandi plaköt og viðtökurnar hafa komið mér mjög skemmtilega á óvart,“ segir Rakel en veggspjöldin má kynna sér á Facebook.