Jónatan víkur og við tekur Felix sem Júróvisjónkóngur Íslands

Þátttaka í Júróvisjón-söngvakeppninni kostaði RÚV 30 milljónir. Fulltrúar Íslands voru ekki fleiri en verið hefur og þá er það til að taka að Jónatan Garðarsson víkur, sem sérlegur yfirmaður Júróvisjón-mála Íslands.

Skarphéðinn Guðmundsson er yfirmaður innlendrar dagskrárgerðar hjá RÚV og hann gerir fastlega ráð fyrir því að áætlanir standist, en þær gera ráð fyrir því að heildarkostnaður vegna þátttöku RÚV í Júróvisjón verði 30 milljónir króna.

Skarphéðinn var spurður hvort það hafi ekki verið svo að stærri hópur Íslendinga hafi farið á vegum RÚV utan til að fylgjast með og greina frá keppninni en hann segir svo ekki vera.

„Fjöldi fulltrúa Íslands í Stokkhólmi, keppendur, fulltrúar frá RÚV, bæði í tengslum við flutning atriðisins sjálfs, utanumhald og fararstjórn og fréttaflutning, var nákvæmlega sá sami og verið hefur síðustu árin. Sem var og verið hefur undanfarin ár algjör lágmarks fjöldi til að yfir höfuð sé hægt sé að taka þátt og sinna öllu sem því tengist  – enda erum við að tala um einn allra fámennasta sendihóp allra keppnisatriða.“

Gísli Marteinn Baldursson lýsti keppninni að þessu sinni en í fyrra var það Felix Bergsson sem sá um þann þátt. Felix var engu að síður á vettvangi og sendi vinum sínum á Facebook myndskeið og greindi frá stemmningunni. Hvað var hann að gera þarna?

„Felix var drekkhlaðinn verkefnum, kom að öllu utanumhaldi, aðstoð við keppendur, umsýslu í kringum þátttökuna, kynningarmálum fyrir þátttöku Íslands gagnvart erlendum fjölmiðlum og til fjölmiðla á Íslandi,“ segir Skarphéðinn. Og heldur áfram:

„Formlegt hlutverk hans var aðstoðarmaður yfirmanns íslensku sendinefndarinnar, Jónatans Garðarssonar, því um leið var Felix að kynna sér í þaula öll þau gríðarlegu umsvif sem starfi yfirmanns Eurovision tengjast, því eins og þér hefur greinilega borist til eyrna þá stefnir allt í að þetta verði seinasta ferð Jónatans, sem verið hefur yfirmaður Eurovision fyrir hönd Íslands nær samfleytt síðan 2001.“