Aprílspá Siggu Kling – Naut: Átt það til að elska aðeins of mikið

Elsku Nautið mitt. Ég veit að þú ert fullt af tilfinningum en athugaðu að stundum þarf að fleygja þessum tilfinningum aðeins frá sér því að þú þarft að ná þér í balance, eða jafnvægi á íslensku. Það er svo mikilvægt!

Þú átt það til að elska aðeins of mikið og það er svo sannarlega hægt að gera. Svo getur þú orðið pínulítið pirrað yfir því að þér sé ekki sýnd öll ástin sem þú hefur sýnt á móti.

Þú þarft að hafa það á hreinu að það er alveg sama hve mikið þú gefur að þú skalt ekki búast við neinu á móti. Ef þú gefur og heldur að þú fáir eitthvað í staðinn þá gengur þú allt lífið grátandi. Veröldin gefur frá öðrum stöðum en þar sem þú gefur og þú færð ekki alltaf það sama til baka.

Veröldin mun færa þér jákvætt karma af því að þú ert góð manneskja og gott við fólkið í kringum þig. Karmað kemur ekki endilega frá því fólki sem þú býst við heldur kannski einhverjum allt öðrum!

Eftir því sem þú gerir meira, elskan mín, því meira færð þú. Þetta lögmál er yfir nautsmerkinu sérstaklega næstu þrjá mánuði.

Venus er líka að klingja bjöllunum þínum og þá geta tilfinningarnar farið af stað og þú fengið pínu sting í magann en athugaðu að stundum er allt í lagi að líða pínulítið illa, svo lengi sem það er ekki til langs tíma þá er það bara eðlilegt og þá kann maður betur að meta það þegar manni líður vel.

Þetta eru allt tilfinningar og það er svo há tíðni núna í orkustrengjunum í kringum þig og það er þannig alveg fram í miðjan júlí og þú skalt passa þig á öllum öfgum. Ekki drekka of mikinn bjór, ekki borða of mikið súkkulaði, ekki “óverdósa” á neinu, þá er ég líka að meina að prjóna of mikið, sofa of mikið eða vaka of mikið.

Lausnin til þess að láta þér líða vel, elskan mín, er jafnvægi á milli alls. Þegar líða tekur á apríl færð þú skilaboð sem breyta mörgu í ferlinu þínu, þau eru þér fyrir mjög góðu en þér gæti fundist eins og að það sé vegið að þér.

En skilaboðin boða breytingar, boða heppni og nýja möguleika og það er spennandi samkvæmt mínum bókum!

Ef ég ætti að gefa þér eitthvað mottó, elsku Nautið mitt, er það að innsæið þitt er þinn fjársjóður, notaðu það betur og þá gengur þér svo miklu betur.

Lífið er gott,

Þín Sigga Kling

Fræg naut: Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj. snillingur.