Aprílspá Siggu Kling – Ljón: Ert eins heitt og sólin!

Elsku dásamlega Ljónið mitt. Þú hefur svo líflegt og skemmtilegt ímyndunarafl. Og drífandi áhrif á aðra og svo skemmtilegan frásagnarhátt að þú getur fengið hvern sem er til þess að trúa því sem þú segir.

Ef þessir eiginleikar flokkast ekki sem kostir þá eru kostir ekki til!

Þú ert akkúrat sú manneskja sem þarf að átta sig á því að hún er leiðtogi.

Leiðtogi er ekki endilega sá sem að stjórnar fyrirtækinu eða öllu í kringum sig, heldur er hann sá sem tekur hundrað prósent ábyrgð á því sem hann gerir. Leiðtogi er nefnilega fyrirmynd.

Þú mátt alls ekki gefast upp þó að þú hafir lent í einhverju roki. Þú munt finna leiðir út úr öllum þínum vandræðum því að þú ert líka skyldur kettinum elsku Ljón og hann hefur níu líf og þú átt allavega átta eftir!

Þú verður fljótt að ákveða að fara út úr neikvæðum aðstæðum og skapa þér jákvæðari aðstæður.

Það er allt að gerast með svo miklum hraða í kringum þig að þú þarft að vera eins og limbódansari, en engar áhyggjur því kattardýr eru mjög liðug!

Þetta er svo sannarlega gott tímabil og það breytir ekki bara mörgu heldur öllu.

Þú ert búinn að vera svo hjartagott og hjálpsamt og ert stöðugt að hressa við niðurdregna vini. Passaðu bara að stundum getur þú verið of gott og jafnvel meðvirkt.

Plánetan þín er sólin og hversu merkilegt er það eiginlega? Það er ekki amalegur krafturinn sem hún á eftir að gefa þér en sólin getur líka haft alvarlegar afleiðingar. Hún getur verið of heit og brennt þig og þannig ert þú einnig.

Þú ert svo ástríðufullt og gefur svo mikið af þér að þú getur brennt þig á tilfinningum og þá er það einlægnin sem að mun hjálpa þér í gegnum alla erfiðleika sem að þér sækja.

Það er rosalega mikilvægt á næstu mánuðum að þú hafir allt dálítið skipulagt. Þú mátt ekki hafa allt í drasli í kringum þig og það þarft allt að vera tandurhreint og á sínum stað. Þá er eins og að hugurinn þinn verði jafn skipulagður og allt ryk og drasl hreinlega fjúki úr honum!

Það sem myndi gera svakalega mikið fyrir þig er að fá þér krítartöflu og skrifa niður jafnóðum hvernig þú vilt hafa hlutina og vera líka með svamp svo þú getir þurrkað út það sem þú ert búið að framkvæma.

Ótrúlegasta fólk mun hjálpa þér því að þú, kæra ljón, ert elskað svo heitt.

Knús og koss,

Þín Sigga Kling

Fræg ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari Agent Fresco.