Hæstiréttur hefur dæmt Haga til þess að greiða fjölskyldu skaðabætur eftir að starfsmenn Bónuss í Lóuhólum í Reykjavík stöðvuðu för fjölskyldunnar úr versluninni og sökuðu hana um þjófnað á hárlit í febrúar árið 2014.

Um var að ræða konu, dóttur hennar, börn systur hennar og bróður konunnar. Munu þau hvert og eitt fá greiddar 200 þúsund krónur í skaðabætur.

Voru þau á leið út úr versluninni eftir að hafa greitt fyrir vörur sínar þegar þau voru stöðvuð og meinuð útganga úr búðinni. Voru þau sökuð að hafa stolið varningi og var þeim gert að tæma vasa sína.

Fór fjölskyldan úr yfirhöfnum sínum og tæmdi vasa sína og stóðu starfsmennirnir yfir þeim á meðan. Atburðarásin tók um það bil hálftíma og átti sér stað á álagstíma fyrir framan aðra viðskiptavini verslunarinnar.

Sjá einnig: Hagar sýknaðir vegna meintra kynþáttafordóma starfsmanna Bónuss

Hafði hegðun fjölskyldunnar við snyrtivörurekka í versluninni vakið grunsemdir hjá starfsmönnum Bónuss og talið að hún hefði stolið hárlit. Umrædd vara fannst ekki í fórum þeirra.

Áður hafði Héraðsdómur Reykjavíkur sýknað Haga af fimm milljóna króna skaðabótakröfu fjölskyldunnar. Vildi fjölskyldan meina að starfsmennirnir hefðu sært æru þeirra með því að hafa þjófkennt hana.

Áfrýjaði fjölskyldan dómi Héraðsdóms til Hæstaréttar. Í dómi Hæstaréttar segir að þó að játa þurfi verslunareigendum ákveðið svigrúm við eftirlit með þjófnaði bæri þeim að haga verklagi við eftirlitið á þann hátt að ekki væri gengið lengra en þörf krefði og að nærgætni og háttvísi væri gætt.

Jafnframt segir að sú háttsemi starfsmanna Haga að gera fjölskyldunni að tæma vasa sína í opnu rými verslunarinnar, að öðrum viðskiptavinum ásjáandi og að undangegnum ósönnum staðhæfingum um þjófnað, hefði verið meiðandi og falið í sér ólögmæta meingerð gegn persónu þeirra og æru.

Dóm Hæstaréttar má skoða hér.