Allt tiltækt slökkvilið kallað út vegna bruna í Breiðholti

Allt tiltækt slökkvilið var kallað út vegna bruna í íbúð í Krummahólum í Breiðholti á áttunda tímanum í kvöld. 

Uppfært 23.50 Greiðlega gekk að slökkva eldinn. Enginn var fluttur á sjúkrahús en nokkrir gengust undir læknisskoðun eftir að hafa andað að sér reyk.

Uppfært 20.20 Búið er að ráða niðurlögum eldsins en hann var bundinn við eina íbúð. Vinna stendur nú yfir við hreinsun.

Uppfært 20.00 Eldurinn logar í íbúð á fimmtu hæð. Krummahólum hefur verið lokað að stórum hluta á meðan slökkvilið athafnar sig. Fjórir dælubílar auk körfubíls eru á vettvangi. Talsverðan reyk leggur frá íbúðinni.

Hér að neðan má sjá myndir sem Ernir Eyjólfsson, ljósmyndari Fréttablaðsins og Vísis, tók á vettvangi.