Styttist í tillögur um fíkniefnamál

Starfshópur heilbrigðisráðherra sem falið var það verkefni að kanna afglæpavæðingu fíkniefna lýkur störfum innan skamms. Þetta kom fram í máli Ólafar Nordal innan­ríkisráðherra við sérstaka umræðu á Alþingi í gær.

„Mér skilst að sá hópur sé alveg á lokametrunum með að klára. Vinnan hefur gengið þokkalega vel og menn hafa verið að ná samkomulagi um breiðar línur. Þegar þeirri vinnu lýkur tel ég alveg ljóst að það þarf að hefja samtal milli þessara tveggja ráðuneyta um það hvort það eigi að skoða breytingar á refsipólitíkinni,“ sagði Ólöf Nordal. Málið heyrir undir bæði heilbrigðisráðuneytið, sem ber ábyrgð á lögum um ávana- og fíkniefni, og innanríkisráðuneytið sem ber ábyrgð á almennum hegningarlögum.

Það var Valgerður Bjarnadóttir, þingmaður Samfylkingarinnar, sem hóf umræðuna. Hún vakti athygli á því að það væri tvennt ólíkt að leyfa fíkniefni eða afglæpavæða það að hafa fíkniefni í fórum sínum. Hún vísaði í umræðu sem fór fram á vegum Snarrótarinnar fyrr í vetur þar sem ræðumönnum bar saman um að aðferðir sem notaðar eru í fíkniefnastríðinu beri engan árangur.

„Í Hollandi hefur sala kannabisefna verið háð litlum takmörkunum um margra ára skeið. En neysla þeirra er minni en í mörgum Evrópulöndum og neysla sterkra efna er minni en í mörgum Evrópusambandslöndum,“ sagði Valgerður. Hún benti líka á að reynsla Portúgala af breyttri löggjöf væri góð.