„Nú er komið í ljós að forsætisráðherrahjónin eru í gegnum peningafélag sitt skráð á Tortóla meðal kröfuhafa í alla íslensku bankana upp á mörg hundruð milljónir króna. Á meðan íslenskur almenningur, fjölskyldur og heimili, þurftu í gegnum hrunið og í kjölfar þess að berjast frá degi til dags til að halda heimili sínu gangandi innan gjaldeyrishafta og fallinnar krónu og reyna að standa í skilum með skuldbindingar sínar voru forsætisráðherrahjónin að höndla með fjölskylduauðinn í erlendum skattaskjólum,“ sagði Björn Valur á Alþingi í dag.
Þá gerði hann að umtalsefni orð Sigmundar Davíðs á seinasta kjörtímabili og sagði hann ítrekað hafi krafist þess úr ræðustól Alþingis að fá að vita hverjir væru raunverulegir eigendur bankanna, það er kröfuhafar þeirra. Nú væri komið í ljós að hann sjálfur hafi verið einn af þeim.
„Þetta setur slagorð Framsóknarflokksins um heimilin í landinu í allt annan og óskemmtilegri búning en hingað til. Það er allt rangt við þetta mál, virðulegi forseti, og það stenst á engan hátt réttmætar lágmarkskröfur sem gerðar eru til stjórnmálamanna,“ sagði Björn Valur. Þá fór hann fram á það að þingfundi yrði frestað og að forsætisráðherra yrði gert kleift að útskýra mál sín fyrir Alþingi.
Vildi að Björn Valur bæðist afsökunar á orðum sínum
Þórunn Egilsdóttir, þingmaður Framsóknarflokksins og 2. varaforseti Alþingis, gaf lítið fyrir orð Björns Vals:
„Ég ætla að hefja mál mitt á því að frábiðja mér málflutning eins og þann sem háttvirtur þingmaður Björn Valur Gíslason býður okkur upp á. Þar held ég að botninum hafi verið náð og finnst ekki ólíklegt að menn sem komnir eru á þennan stað á botninum eigi erfitt með að finna viðspyrnu til að koma sér upp. Það er algjörlega óboðlegt að vera með svona málflutning. Öll málefni þeirra ágætu hjóna eru uppi á borðinu, allir skattar hafa verið greiddir og hér er ekki verið að fela neitt,“ sagði Þórunn. Þá krafðist hún þess að Björn Valur myndi biðjast afsökunar en skemmst er frá því að segja að það gerði þingmaðurinn ekki.
Björn Valur og Þórunn tóku til máls undir liðnum störf þingsins en nokkrir þingmenn tóku skiptust svo á skoðunum um málið undir liðnum fundarstjórn forseta. Svandís Svavarsdóttir, samflokkskona Björns Vals, sagði að umræðan sem vakin væri á málinu af hálfu þingmannsins væri ekki úr lausu lofti gripin.
„Það kemur fram yfirlýsing frá eiginkonu hæstvirts forsætisráðherra um fjárhagsmál hennar, sem sannarlega eru hennar, en þeirri umræðu fylgir að Jóhannes nokkur, aðstoðarmaður forsætisráðherra, sjái um samskipti við fjölmiðla hvað það mál varðar hér eftir. Þannig að það að tengja þetta mál stöðu forsætisráðherra og hagsmunum hans og hagsmunaskráningu er ákvörðun sem þau hafa tekið sjálf. Þess vegna er fullkomlega eðlilegt að við ræðum það hér hvort ekki sé réttast — við erum nú hér í dag að ræða siðareglur — að hagsmunaskráning þegar um er að ræða svo ríka fjárhagslega hagsmuni innan heimilis,“ sagði Svandís.
Einar K. Guðfinnsson, forseti þingsins, blandaði sér í umræðuna og vakti meðal annars athygli á því að í hagsmunaskráningu Alþingis væri kveðið mjög skýrt á um að upplýsingar um fjármál maka þingmanna eiga ekki erindi þar.
„Það hefur svo sem oft verið rætt hvort hafa eigi upplýsingar um maka þingmanna í hagsmunaskráningu Alþingis, en niðurstaðan verið sú að svo ætti ekki að vera og forseti hefur stutt þá niðurstöðu,“ sagði Einar.
