Segir hótelið hafa getað komið í veg fyrir að eltihrellir náði nektarmyndum af sér

Bandaríska íþróttafréttakonan Erin Andrews segir að hún hafi daglega þurft að endurlifa atvikið þar sem eltihrellir hennar náði myndbandsupptöku af henni nakinni á hótelherbergi fyrir sjö árum síðan.

Í frétt New York Times kemur fram að réttarhöld í máli Andrews gegn Nashville Marriott hótelinu hafi haldið áfram í Nashville í gær, en hún hefur farið fram á greiðslu 75 milljóna Bandaríkjadala í skaðabætur.

Andrews starfar nú sem íþróttafréttakona hjá Fox sjónvarpsstöðinni en starfaði á þeim tíma hjá ESPN. Hún sagði fyrir dómi að hún fái stöðugt skilaboð sem snúa að myndskeiðinu, allt frá því að því var dreift á netinu 2008.

Maðurinn sem tók upp myndskeiðin, Michael David Barrett, hefur nú þegar afplánað tveggja ára dóm vegna málsins, en hann ferðaðist milli ríkja í þeim tilgangi að mynda Andrews við fjölda tilvika.

„Ég skammast mín svo mikið. Þetta gerist á hverjum degi. Annað hvort fæ ég send tíst, eða þá minnist einhver á þetta í blöðunum, eða einhver sendir mér skjáskot úr myndbandinu á Twitter-síðu minni, eða þá öskrar einhver á mig úr áhorfendapöllunum,“ sagði Andrews í vitnastúkunni.

Þá sagðist hún vera hrædd við að hitta fólk og fara á stefnumót. Ávallt spyrji hún sig: „Hefur hann séð myndbandið?“

Hún segir að hægt hefði verið að koma í veg fyrir áreitið sem hafi orðið fyrir og því ákveðið að lögsækja Barrett og hótelið um samtals 75 milljónir Bandaríkjadala, eða tæpa tíu milljarða króna.

Andrews segir að starfsmenn Marriott hefðu átt að upplýsa hana um að maður hafi spurst fyrir um hvort hún dvaldi á hótelinu. „Það hefði verið hægt að koma í veg fyrir þetta. Starfmenn Nashville Marriott hefðu getað hringt í mig og sagt: Við ætlum að setja þennan mann sem var að spyrja um þig í herbergið við hliðina á þér. Er það í lagi?“ Þá hefði ég getað hringt í lögregluna og við hefðum náð honum. Ég er svo reið. Ég er svo brjáluð.“

Barrett hefur viðurkennt að hafa notast við smærri gerð af öxi til að opna gægjugöt á hótelherbergjum til að mynda Andrews og raunar fleiri konur.

Andrews starfar nú á Fox sjónvarpsstöðinni sem íþróttafréttamaður og er kynnir þáttanna Dancing with the Stars á ABC.

Hún ræddi málið í þætti Oprah Winfrey árið 2009 og má sjá brot úr viðtalinu að neðan.