Uppnám innan dönsku stjórnarinnar

Líf dönsku ríkisstjórnarinnar hékk í gær á bláþræði eftir að skyndilega brutust út deilur um athafnir Evu Kjer Hansen, umhverfis- og matvælaráðherra.

Óljóst var í gærkvöld hvort stjórnin myndi lifa af þessa eldraun, en Lars Løkke Rasmussen forsætisráðherra kallaði í gær formenn hinna hægriflokkanna á sinn fund og hótaði að boða til þingkosninga, næðist ekki samkomulag.

Fundi formannanna lauk án niður­stöðu í gær, en Løkke Rasmussen ætlar halda áfram að reyna að ná sáttum á þinginu í dag, þegar landbúnaðarfrumvarp stjórnarinnar verður borið undir þingið.

Málið komst í hámæli á þriðjudag þegar Íhaldsflokkurinn, sem hefur stutt minnihlutastjórn Venstre-flokksins, sagðist ekki lengur bera traust til Evu Kjer Hansen.

Lars Løkke Rasmussen forsætisráðherra, sem jafnframt er leiðtogi Venstre-flokksins, brást við af fullri hörku og hótaði að boða til þingkosninga tækist ekki sátt.

Søren Pape, sem er leiðtogi Íhaldsflokksins, gagnrýnir Evu Kjer Hansen fyrir að hafa gefið þinginu villandi upplýsingar í tengslum við landbúnaðarfrumvarpið. Ágreiningurinn snýst um það hvort tiltekin efnisatriði í frumvarpinu muni reynast umhverfinu skaðleg.

Leiðtogar hinna hægriflokkanna, Danska þjóðarflokksins og Frjálslynda bandalagsins, taka þó ekki undir kröfur Papes um afsögn Kjer Hansen. Þeir Kristian Thulesen Dahl og Anders Samuelsen segja Pape hafa brugðist allt of hart við, þótt ágreiningur sé um efnistatriði frumvarpsins.

Pape sagðist hins vegar síðdegis í gær standa fastur á því að Kjer Hansen þurfi að víkja úr embætti, jafnvel þótt breytingar verði gerðar á efnisatriðum frumvarpsins í meðferð þingsins í dag.

„Ég hef sagt það allan tíman að þetta snúist um trúnaðartraust, sem ekki er til staðar,“ er haft eftir Pape á vefsíðu dagblaðsins Politiken. „Þetta snýst ekki um embætti eða tiltekið umráðasvið, heldur snýst þetta um einstakling.”

Pape á töluvert á hættu, fari leikar svo að Løkke Rasmussen boði til þingkosninga. Í síðustu kosningum fékk Íhaldsflokkur Papes ekki nema 3,4 prósent atkvæða, og gæti átt á hættu að detta alveg út af þingi.