Marsspá Siggu Kling – Vog: Fáðu fólk í lið með þér með persónutöfrunum

Elsku, elsku vogin mín. Þú ert eitthvað svo glamorus og það fylgja þér svo mikil smekklegheit og hugmyndir.

Þú hefur þann kraft til þess að geta haft áhrif sem litríkasta merkið í sólkerfinu. Breiddu úr vængjunum þínum og byrjaðu að fljúga, því að þú ert stílistinn í eigin lífi.

Þú ert svo skemmtilega skipulögð sem margir sjá kannski ekki sem einkennið þitt því að þú getur líka átt erfitt með að taka ákvarðanir og færð smá valkvíða. En það er bara ekki alveg rétt, að minnsta kosti ekki núna því þú ert alveg „on-fire“! Þú átt eftir að vera svo mikið í símanum og ganga frá svo mörgu og þú þarft að setja ákveðin mörk við sumt fólk í kringum þig, bara í rólegheitum, svo þú missir ekki orkuna þína.

Það eru töluverðar áhyggjur í kringum þig út af öðru fólki en mundu það, elsku vogin mín, að þú bjargar engum með því að hafa áhyggjur af þeim.

Úr áhyggjum myndast aldrei lausnir, þú þarft að sýna öðrum að þú sért það sterk að ekkert bugi þig þó að þér fallist kannski örlítið hendur og þér líði illa.

Steinhættu að stjórna fólki í kringum þig, fáðu það frekar í lið með þér með persónutöfrunum. Þú ert fullfær um það og ef þú gerir það áttu eftir að verða sigursæl.

Það er fólk í kringum þig sem á eftir að reyna að herma eftir þér og ekkert vera að láta það fara í taugarnar á þér heldur líttu á það sem hrós og merki um að þú sért að gera eitthvað rétt.

Ef þú ert karlmaður í voginni hjartað mitt þá skalt þú ekki vera að skipta um skoðanir í sambandi við ástina. Þú þarft örugga og pottþétta ást svo ekki skipta út ástinni fyrir einhverja skyndihugsun sem verður svo ekki að neinu. Þetta getur líka átt við þig þó þú sért kona en ég skynja þetta skýrar hjá ykkur körlunum.

Þegar þú átt síst von á því að eitthvað breytist verður þú svo rosalega heppin og fyllist þeirri ánægjutilfinningu sem mun gefa þér bensín til að halda áfram svona hnarreist eins og þú ert elskan mín.

Mottóið þitt er: Þú þarft svolítið að feika það þangað til þú munt meika það. Og mundu hjartans vogin mín að betri er ein ást í hendi en fjörutíu í skógi.

Frægir í voginni: Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Steingrímur Sævarr Ólafsson fjölmiðlaráðgjafi, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir þingkona.