Hádegisfyrirlestraröð um Listvinafélagið

Listfræðafélag Íslands efnir til hádegisfyrirlestra um Listvinafélagið og efni tengd því í lestrarsal Safnahússins við Hverfisgötu, fyrsta miðvikudag í hverjum mánuði vorið 2016, frá og með 3. febrúar, en þá eru liðin hundrað ár frá því að félagið var stofnað. Fyrir­lesarar eru félagsmenn Listfræðafélags Íslands og eru allir velkomnir.

Fyrsti fyrirlesturinn verður haldinn miðvikudaginn 3. febrúar klukkan 12 í Safnahúsinu við Hverfisgötu en þá mun Júlíana Gottskálksdóttir listfræðingur greina frá stofnun Listvinafélags Íslands og starfi þess og hlutverki sem vettvangi fyrir myndlist á Íslandi á starfstíma sínum 1916-1932. Myndir frá fyrstu sýningu Listvinafélagsins árið 1919 verða birtar með fyrirlestrinum.

Listvinafélagið lognaðist út af árið 1932 en á starfstíma sínum var það öflugur félagsskapur sem átti mikilvægan þátt í að auka þekkingu og áhuga á myndlist hér á landi og gera myndlist aðgengilega almenningi. Það er því vel við hæfi að minnast 100 ára afmælis félagsins með fyrirlestraröð þar sem fjallað er um íslenska myndlist í húsi sem hýsir sýninguna Sjónarhorn, sem veitir innsýn í íslenskan myndheim fyrr og nú.

Listfræðafélag Íslands, sem stendur á bak við fyrirlestrana, var formlega stofnað í maí árið 2009 af hópi listfræðinga, sýningarstjóra og annarra fagaðila á sviði listfræða á Íslandi. Félagsmenn eru um sextíu.