Getur ekki hugsað það til enda verði landsfundi ekki flýtt

Fylgi Samfylkingarinnar hefur verið langt undir kjörfylgi undanfarna mánuði og í síðustu könnunum jafnvel undir tíu prósentum. Áætlað hefur verið að formannskjör fari fram í flokknum í lok þessa árs,  í aðdraganda landsfundar sem síðan færi fram í janúar eða febrúar á næsta ári. En þá yrðu aðeins nokkrir mánuðir í alþingiskosningar.

Ólína setti færslu inn á Facebook síðu flokksins í dag þar sem segir:

„Félagar góðir. Eftir Gallupkönnunina í gær hlýtur öllum að vera ljóst að við svo búið má ekki standa lengur. Flokkurinn mun ekki lifa til haustsins með þessu áframhaldi. Ég legg til að landsfundi og þar með formannskjöri verði flýtt fram í maí. Staðan er óþolandi fyrir alla sem málið varðar og nú er mál að linni.“

Eftir þessari færslu að dæma ertu ekki mjög ertu ekki mjög bjartsýn á framtíð flokksins?

„Það er alveg ljóst að flokkurinn þarf einhverja breytingu núna. Það þarf einhver hreyfing að fara af stað ef hann á að endurnæra sig og finna erindi sitt að nýju,“ segir Ólína.

Í könnun Capacent Gallup sem birt var í gær mældist flokkurinn með 9,2 prósenta fylgi og kannanir hafa verið með flokkinn á þeim slóðum lengi.  Ólína telur að það myndi gera flokknum gott að fara í hugmyndafræðilega vinnu sem fylgi landsfundum.

„Og ég yrði ekki hiss ef þá yrði formannskosning. Annað hvort myndi þá núverandi formaður endurnýja sitt umboð eða nýr formaður kosinn í hans stað. Að minnsta kosti fengju flokksmenn þar með tækifæri til að veita einhverjum umboð. Á forsendum málefnaáherslna sem meirihluti flokksins stæði fyrir. Þá vonandi skýrari meirihluti en kom fram í síðasta formannskjöri,“ segir Ólína.

En á landsfundi í fyrravor var Árni Páll Árnason kjörinn formaður með eins atkvæðis mun eftir óvænt mótframboð Sigríður Ingibjargar Ingadóttur, þingmanns Samfylkingarinnar, kvöldið fyrir formannskjör.

„Það er auðvitað ekkert leyndarmál að það er forystuvandi í flokknum. Umboðið er ekki er ekki mjög skýrt. Umboð sem veltur á einu atkvæði er ekki mjög skýrt. Úr því þarf að bæta,“ segir þingmaðurinn að vestan.

Framtíð flokksins sé ekki björt ef landsfundi verði ekki flýtt.

Hverju spáir þú þá um gengi flokksins?

„Ég vil ekki hugsa þá hugsun til enda,“ segir Ólína Kjerúlf Þorvarðardóttir.