Vegfarendur sem komu að banaslysinu í Reykjanesbæ í gær reyndu endurlífgunartilraunir þar til björgunaraðilar komu á vettvang. Einn lét lífið þegar tveir bílar skullu saman í hörðum árekstri skömmu fyrir klukkan fimm í gær.
Í tilkynningu frá Lögreglunni á Suðurnesjum segir að veðurskilyrði hafi verið slæm þegar slysið varð. Þá hafi verið myrkur, rigning og talsverður vindur. Allt tiltækt lið lögreglu og slökkviliðs- og sjúkraflutninga kom á vettvang auk læknis. Vinna á vettvangi tók þrjá tíma og var gatan lokuð á meðan.
Enn er unnið að því að tilkynna nánustu ættingjum um banaslysið, samkvæmt lögreglunni, og því er ekki mögulegt að greina frá nafni hins látna að svo stöddu.
Rannsókn á tildrögum slyssins stendur yfir.
Vegfarendur reyndu endurlífgun
Tengdar fréttir
Banaslys í Reykjanesbæ
Einn lést í alvarlegu umferðarslysi sem átti sér stað í Reykjanesbæ um klukkan fimm síðdegis í dag.
