Nýr plöntusjúkdómur á Íslandi

Nýr plöntusjúkdómur hefur greinst á Íslandi. Skaðvaldurinn er baktería sem barst til landsins með innflutning á rósagræðlingum. Vonir standa til þess að tekist hafi að uppræta sjúkdóminn.

Í tilkynningu frá Matvælastofnun segir að undir lok síðasta árs hafi kom upp sjúkdómur í rósaplöntum í gróðurhúsi á Suðurlandi. Við nánari rannsókn greindist bakteríutegundin Ralstonia solanacerum í rósunum. Getur hún valdið miklum afföllumm meðal annars í kartöflu- og tómatarækt.

Kartafla er helsti hýsill bakteríunnar en hún getur einnig sýkt aðrar plöntur. Sýkingin lýsir sér þannig að leiðslukerfi plöntunnar stíflast af bakteríunum og laufblöð byrja að visna neðst á sýktum plöntum og færist sýkingin svo ofar með þeim afleiðingum að plantan veslast upp.



Barst til landsins frá Hollandi

Barst hún til landsins með innflutning á rósagræðlingum frá Hollandi síðasta sumar. Þegar voru gerðar ráðstafanir þar og eru ekki taldar líkur á að sjúkdómurinn hafi borist hingað með fleiri sendingum.

Matvælastofnun telur líklegt að tekist hafi að uppræta sjúkdóminn en strax var gripið til varúðarráðstafana til að uppræta sjúkar plöntur og hindra frekari dreifingu. Bakterían hefur ekki greinst í sýnum sem hafa verið tekin eftir að sýktum plöntum var eytt.

Fylgst verður áfram með þróun mála en Matvælastofnun bendir á að tilkynna skal tafarlaust til stofnunarinnar um minnsta grun um sýkingu í gróðurhúsum.