Diego: Hlakka til að klæðast íslensku treyjunni

Diego Jóhannesson, spænski Íslendingurinn sem spilar með Real Oviedo í 2. deildinni á Spáni var í gær valinn í karlalandsliðið í fótbolta í fyrsta sinn.

Diego verður í hópnum sem ferðast til Los Angeles í lok mánaðar og mætir þar bandaríska landsliðinu á Stub Hub-vellinum, heimavelli Los Angeles Galaxy.

Sjá einnig:Hamingjuóskum rignir yfir Diego

Þessi 22 ára gamli bakvörður var í skýjunum með landsliðsvalið þegar Vísir heyrði í honum hljóðið, en hann hefur ekki farið leynt með áhuga sinn á að spila fyrir íslenska landsliðið undanfarna mánuði.

Lagt mikið á mig

„Ég er svakalega ánægður. Þetta er gríðarlega stórt og mikilvægt tækifæri fyrir mig. Ég ætla að nýta þessa ferð til að sannfæra landsliðsþjálfarana um hvað ég get,“ segir Diego í viðtali við Vísi.

Diego er í raun samningsbundinn varaliði Oviedo en var óvænt kallaður upp í aðalliðið þegar báðir bakverðir liðsins meiddust snemma á leiktíðinni.

Þrátt fyrir að þeir séu báðir komnir til baka eftir meiðslin hefur Diego ekki litið um öxl og er búinn að negla niður hægri bakvarðarstöðuna hjá liðinu. Hann spilar hvern einasta leik og lagði upp mark í 2-2 jafntefli gegn Lugo um helgina.

„Ég hef lagt mikið á mig fyrir mitt lið og mér hefur gengið vel. Ég bjóst ekki endilega við kalli í landsliðið svona snemma en ég fyllist bara stolti að fá þetta tækifæri,“ segir Diego.

Hlakka til að hitta þjálfarana

Þegar Heimir Hallgrímsson, annar landsliðsþjálfara landsliðsins, kynnti hópana fyrir verkefnin í Sameinuðu arabísku furstadæmunum og Bandaríkjunum ræddi hann að fyrra bragði um Diego og sagði:

„Ég hitti þá feðga í desember og þetta virkar afskaplega ljúfur strákur. Hann er bara ekki með íslenskt vegabréf. Það er því algjörlega ótímabært að ræða þennan leikmann fyrr en hann fær íslenskt vegabréf.“

Sjá einnig:Real Oviedo gleðst yfir vali Diego á Twitter-síðu

Faðir Diego er íslenskur og er hann einnig með íslenskan ríkisborgararétt þannig að fá íslenskt vegabréf tók ekki langan tíma.

„Sannleikurinn er sá, að það var var ekkert mál að fá vegabréf. Það gekk allt saman mjög hratt fyrir sig,“ segir Diego sem hefur ekki rætt við Heimi síðan um jólin.

„Við höfum ekki fengið tækifæri til að spjalla frekar saman en ég hlakka mikið til að hitta þjálfarann og spjalla við hann aftur.“

Mikill fjölmiðlaáhugi á Spáni

Leikurinn við Bandaríkin 31. janúar er ekki á Alþjóðlegum leikdegi þannig Diego þarf að fórna toppslag á móti Deportivo Alavés í spænsku 2. deildinni þar sem lið hans Real Oviedo er í baráttunni um að komast upp í deild þeirra bestu. Diego fórnar leiknum fúslega, en var það ekkert mál að hálfu Oviedo að missa bakvörðinn fyrir þennan leik?

„Nei, Oviedo setti sig ekki upp á móti þessu. Oviedo er bara stolt að eiga landsliðsmann,“ segir spænski Íslendingurinn. „Mér hefur gengið vel og ég er að spila alla leiki en þetta er bara svo spennandi verkefni með íslenska landsliðinu. Ég hlakka til þess og líka að koma aftur heim og spila fyrir Oviedo.“

Diego vonast til að fá tækifæri inn á vellinum á móti Bandaríkjunum í Los Angeles. „Ég er rosalega spenntur og ég hlakka mikið til að klæðast íslensku treyjunni. Vonandi fæ ég að spila og ef ég er svo heppinn þá ætla ég að reyna að standa mig,“ segir Diego.

Bakvörðurinn var nýkominn úr viðtali við spænska sjónvarpsstöð þegar Vísir tók hann tali.

„Það hefur verið mikill fjölmiðlaáhugi síðan valið var tilkynnt. Ég er í öllum fréttum í Oviedo og nokkrum stórum miðlum,“ segir Diego sem viðurkennir að stóra markmiðið sé vitaskuld að fara með á EM í Frakklandi.

„Mitt helsta markmið er að standa mig vel og reyna að vera í hópnum sem fer á Evrópumótið í Frakklandi. Ég veit að það verður ekki auðvelt en ég ætla að reyna,“ segir Diego Jóhannesson.