Ís­land í þrettánda sæti á spillingar­listanum

Danmörk, Finnland og Svíþjóð raða sér í toppsætin á nýbirtum lista Transparancy International sem mælir spillingu í löndum heimsins. Efsta sætið þýðir að þar þykir vera minnsta spilling í heimi og eftir því sem lönd lenda neðar á listanum eykst spillingin. Ísland lendir í þrettánda sæti, sæti neðar en í fyrra en fær þó jafnmörg stig í könnuninni sem gerð er til að meta spillingu í hverju landi fyrir sig. Samkvæmt Transparancy International er Ísland því spilltasta ríki Norðurlanda.

Á eftir Norðurlöndunum þremur koma Nýja Sjáland í fjórða sæti og Holland og Noregur verma síðan fimmta sætið saman. 167 lönd eru á listanum í ár og samkvæmt honum er Sómalía spilltasta land jarðar, fær átta stig í könnunninni en Ísland fær 79 svo dæmi sé tekið og fyrirmyndarlandið Danmörk fær 91 stig.

Árin 2005 og 2006 var Ísland í efsta sæti listans en á árunum eftir hrun féll það niður listann.