Brjóstamiðstöð í Ármúla lítur til Grænlands

Rekstur alþjóðlegrar brjóstamiðstöðvar er hafinn í Klíníkinni Ármúla. Kristján Skúli Ásgeirsson brjóstakrabbameinsskurðlæknir og Rógvi Winthereig Rasmussen, sérfræðingur í myndgreiningu brjósta, hafa stofnað fyrirtækið The Nordic Breast Institute í kringum starfsemina.

„Við erum í viðræðum við Sjúkratryggingar og erum bjartsýnir á að við munum geta boðið íslenskum brjóstakrabbameinssjúklingum þjónustuna,“ segir Kristján Skúli. Markmið miðstöðvarinnar er að bjóða upp á sérhæfða þjónustu í greiningu, ráðgjöf og meðferð brjóstameina. Einnig verður boðið upp á ráðgjöf, eftirlit og fyrirbyggjandi skurðaðgerðir fyrir konur sem eru arfberar BRCA-gensins.

Miðstöðin hefur verið starfandi í Klín­íkinni Ármúla frá því í október á síðasta ári. Á þeim tíma hafa fimm hópar af færeyskum konum komið í skurðaðgerð. Þeir Kristján Skúli og Rógvi hafa gert samning við færeyska ríkið vegna kvennanna. Nú vilja þeir bæta við sig íslenskum og grænlenskum konum.

„Þetta er einkarekstur, greiddur af ríkinu, en ekki einkavæðing, það er það sem er mikilvægt,“ segir Kristján Skúli og bendir á að mikill skortur sé á sérfræðingum á sviði hans og Rógva.

„Á stórum kennslusjúkrahúsum getur verið erfitt að fá sérfræðinga í sérstök störf, það er meiri þörf á almennum læknum frekar en sérfræðingum. Þannig að við getum boðið upp á okkar þjónustu með því að ferðast mikið.“

Kristján Skúli og Rógvi hafa unnið saman frá árinu 2010 við greiningar og aðgerðir á færeyskum konum. „Frá þeim tíma höfum við haft mikinn áhuga á að halda samstarfinu áfram og þróa módelið til að bjóða öðrum þjóðum upp á það,“ segir Kristján Skúli. Félagarnir eru í viðræðum við Sjúkratryggingar Íslands og segjast bjartsýnir á það að samningar náist. Einnig eru viðræður í gangi við grænlenska ríkið um að taka á móti grænlenskum konum. „Það væri mjög mikið tækifæri að hjálpa þeim, landið er svo nálægt okkur,“ segir Kristján Skúli.

Ef vel gengur á brjóstamiðstöðinni segir Rógvi að það komi til greina að fjölga sérfræðingum hjá fyrirtækinu. „Við erum með góð tengsl í Englandi, Svíþjóð og í Danmörku, þannig að það kemur til greina,“ segir Rógvi. Einnig kæmi til greina að taka á móti konum frá öðrum Norðurlöndum.

Félagarnir hyggjast einnig nýta aðstöðuna til alþjóðlegra fundahalda á sviði læknisfræðinnar. Fyrsti fundur þeirra verður í maí á þessu ári og verður fjallað um BRCA-genið.