Veður gott og skíðafæri frábært

Öll helstu skíðasvæði landsins eru opin í dag og útlit er fyrir gott veður til skíðaiðkunar.

Í Bláfjöllum er opið í dag frá klukkan 10 til 17 og gengur þar á með éljum til hádegis. Þar er heiðskírt og logn, „bæði við skála og uppi.“ Samkvæmt heimasíðu svæðisins er „frábært færi, harðpakkaður snjór.“

Skíðasvæðið í Tindastól verður að sama skapi opið í dag, frá klukkan 11 til kl 16. Veðrið þar var nú skömmu fyrir klukkan 9: „A 4 metrar á sekúndu, -7c, stjörnubjartur himinn“ og skíðafæri gott.

Þá er einnig opið í Seljalandsdal við Ísafjörð frá klukkan 11. Þar er nú logn, frost um 4 gráður og léttskýjað er fram kemur í tilkynningu frá forstöðumanni svæðisins. Þó er skíðasvæðið í Tungudal lokað.

Skíðasvæðið á Siglufirði er opið í dag frá klukkan 11 til 16. Veðrið um klukkan 8:30 var „SA gola, frost 5 til 7 stig og heiðskírt,“ er fram kemur í tilkynningu. Færið er einnig gott, troðinn og þurr snjór

Skíðasvæðið á Dalvík er opið í dag frá klukkan 10 til 16 og er þar hið fallegasta vetrarveður. Þar er þriggja stiga frost og hægviðri – „sem er alveg tilvakið til skíðaiðkana,“ eins og þar segir.