Drógu ráðningu til baka vegna kynferðisbrots

Kolbeinn Tumi Daðason skrifar 11. janúar 2016 15:00

Ásthildur Sturludóttir, bæjarstjóri í Vesturbyggð.

Sveitastjórn Vesturbyggðar hefur dregið til baka ráðningu Kristins Jóhanns Níelssonar sem skólastjóra við Tónlistarskóla Vesturbyggðar. Greint var frá ráðningunni á föstudaginn en í gær upplýsti sveitastjórinn Ásthildur Sturludóttir að ráðningin hefði verið dregin til baka. Við frekari úrvinnslu á gögnum hefði verið fallið frá því að ráðningunni. Einar Bragi Bragason, sem hafði verið ráðinn kennari við skólann, hefði í staðinn verið ráðinn skólastjóri og hæfi þegar störf.

Engar frekari skýringar eru gefnar á þeim gögnum sem urðu til þess að ráðningin var skyndilega dregin til baka. Samkvæmt heimildum Bæjarins besta á Ísafirði var sveitastjórninni ekki kunnugt um að Kristinn hefði árið 2008 hlotið skilorðsbundinn 45 daga fangelsisdóm fyrir kynferðisbrot gegn ungum stúlkum en brotin áttu sér stað árið 2006 þegar Kristinn var tónlistarkennari á Vestfjörðum.

Í barnaverndarlögum segir að við ráðningu til stofnana þar sem unnið sé með börnum þurfi ávallt að liggja fyrir sakavottorð og upplýsingar úr sakaskrá hafi umsækjandi hlotið dóm fyrir kynferðisbrot. Kristinn er reynslumikill tónlistarkennari og var síðast við störf sem tónlistarkennari í Vík í Mýrdal árið 2012.

Elín Einarsdóttir, oddviti í Mýrdalshreppi.

Breyttu starfsháttum í Mýrdalshreppi

Í yfirlýsingu Elínar Einarsdóttur, oddvita í Mýrdalshreppi, kemur fram að Kristinn hafi ekki upplýst um yfirvofandi dómsmál á hendur sér við ráðninguna. Sömuleiðis hafi hann ekki upplýst um dóminn þegar hann féll. Í kjölfar þess að sveitastjórn varð meðvituð um dóminn var honum boðið að láta af störfum árið 2012.

Vakin er athygli á því að í kjölfar þessa máls hafi það orðið skilyrðislaus krafa hjá Mýrdalshreppi að fólk skilaði sakavottorði áður en það hæfi störf hjá sveitafélaginu. Kristinn hafði þó hreint sakavottorð þegar hann hóf störf.

Brot hans fólust í að leggjast nakinn í rúm með tveimur ungum stúlkum, sem voru nemendur, en með því taldi dómurinn að hann hefði sært blygðunarsemi þeirra að því er fram kemur í dómnum og RÚV greindi fyrst frá. Þurfti hann að greiða annarri stúlkunni 300 þúsund krónur í bætur, en brotið átti sér stað á heimili hennar, en hinni 200 þúsund krónur.

Mest lesið

Fleiri fréttir