Hlutdeild í þorskveiði minnkar

Hlutdeild Íslands í heildar þorskveiði heimsins fer minnkandi.

Árið 2013 var hlutdeild landsins 221 þúsund tonn, eða 16,2 prósent. Það ár var heildarveiðin alls 1.360 þúsundir tonna af þorski, líkt og greint er frá á heimasíðu Landssambands smábátaeigenda.

Af tölum að dæma hefur ástand þorskstofnsins almennt verið gott á tímabilinu 2009 til 2013. Heimsaflinn í lok tímabilsins var um hálfri milljón tonna meiri en í upphafi þess, sem svarar til 57prósenta aukningar, segir þar.

Hér við land hefur aukningin verið nokkru minni eða rúmur fimmtungur, 22 prósent, sem svarar til 39.500 tonna.

Í upphafi tímabilsins, árið 2009, var hlutdeild Íslands rúmur fimmtungur eða 20,9 prósent.