Ráðherra undrast orð Áslaugar Örnu

„Það er mjög einkennilegt að fólk skuli hvetja aðra til þess að svíkja gefin loforð,“ segir Eygló Harðardóttir, félags- og húsnæðismálaráðherra, sem undrast orð Áslaugar Örnu Sigurbjörnsdóttur, ritara Sjálfstæðisflokksins, í Fréttablaðinu í gær.

Áslaug Arna kvaðst efast um að sjálfstæðismenn á Alþingi gætu samþykkt húsnæðisfrumvörp Eyglóar sem nú eru í meðförum velferðarnefndar þingsins.

„Ríkisstjórnin hefur lofað þessum frumvörpum og við munum standa við það loforð,“ segir Eygló. „Þessi frumvörp eru afrakstur gífurlegs samráðs og öll ríkisstjórnin hefur samþykkt frumvörpin.“

Lagt er til að bætur leigjenda hækki og að auka eigi framboð á félagslegu húsnæði. Áslaug Arna Sigurbjörnsdóttir sagði hækkun bóta ekki vera í takt við stefnu Sjálfstæðisflokksins.

„Ég held að þarna sé um að ræða hefðbundinn málflutning ungliðahreyfingar Sjálfstæðisflokksins um að ríkið eigi ekki að koma fólki til aðstoðar,“ segir Eygló um þessi ummæli. „Þessi ríkisstjórn hefur stórhækkað bætur almannatrygginga og sett heimilin í fyrsta sæti og við erum nú að efna loforð sem við gáfum eftir að við kláruðum skuldaleiðréttinguna.“