Nýársspá Siggu Kling – Meyja: Það eru töfrar allt í kringum þig

Elsku meyjan mín. Alltaf stendur þú upp hvernig sem viðrar í kringum þig. Þú ert algjörlega ómetanleg fyrir svo mörgum í kringum þig og það að hjálpa öðrum og standa með þínum fær þig til að tikka í kraftmiklum takti, nánast bara eins og Big Ben í London sem stendur alltaf uppi sama hvað bjátar á í kring.

Það gamla verður hreinsað í burt á nýju ári, sálin verður sterkari og þú tilbúin til að gefa allt þitt eins og sannur sigurvegari. Þú munt fá kraft til að sigra veikindi og afl til að breyta gömlum venjum sem þú hefur verið svolítið föst í.

Og talandi um að þú sért eins og Big Ben þá færð þú þitt wake up call og skynjar hvað það er sem þú vilt gera og verða, þú verður svo ákveðin í öllu þínu að fólk tekur eftir því.

Janúar er algjör upphafsmánuður hjá þér og byggir upp þetta bragðmikla tímabil sem nú er að fara í hönd.

Júpíter gefur þér marga möguleika fyrstu þrjá mánuði ársins og þú grípur tækifærin eins og enginn sé morgundagurinn. Svoleiðis ætti náttúrulega allt lífið að vera því það er bara til dagurinn í dag og enginn hefur verið staddur í framtíðinni, ekki satt?

Þú ert töframaður í þér og getur leikið þér að því að ná árangri, það á ekki síst við í ástamálum. Svo notaðu töfrana þína hvort sem þú ert á lausu eða í sambandi, því það verða svo sannarlega töfrar í ástinni hjá þér sama á hvaða aldri þú ert. Vertu tilbúin til þess að taka á móti þeim og þá breytist allt og þreytt sambönd geta orðið eins og ný. Það eru ekki bara töfrar í ástinni heldur eru þeir líka í vinnunni eða skólanum.

Þú leggur meira á þig og sleppir því sem skiptir ekki raunverulegu máli og þér leiðist að gera. Í kjölfarið aukast vinsældir þínar og mottóið þitt í mánuðnum ætti að vera: Tengslanet mun ég efla eins og best ég get.

Gleðilegt ár elsku meyjan mín! Þín, Sigga Kling

Frægar meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður.