Kolsvart útlit á markaði

sjávarútvegur Söluhorfur á loðnu­afurðum, bæði á heilfrystri loðnu og loðnuhrognum, eru mjög dökkar vegna viðskiptabanns Rússa. Betur gekk en útlit var fyrir að finna ný markaðslönd fyrir hluta af þeim makríl sem eyrnamerktur var Rússum. „Það er verulegt áhyggjuefni hvernig sala á loðnu og loðnuhrognum mun þróast. Rússland og Hvíta-Rússland eru þar afar mikilvægir markaðir, og engir aðrir markaðir koma í staðinn fyrir þá,“ segir Teitur Gylfason, sölustjóri hjá Iceland Seafood. Í sumar voru helstu áhyggjurnar af sölu á makríl. Leitin að kaupendum gekk vonum framar, að sögn Teits, sem telur þó að enn meira hafi verið brætt af makríl en hann átti von á, enda markaðir sterkir fyrir mjöl og lýsi. „Mér sýnist að það hafi verið framleitt mun minna af frosnum makrílafurðum á síðustu vertíð en árin á undan, sem stafar af því að menn nýttu rýmri heimildir til bræðslu.“ „En það gekk betur að selja makríl til Afríku en menn áttu von á. Þetta er t.d. Fílabeinsströndin, Gana, Gabon og Benín. En frá þessum löndum fer hann vísast víðar. Síðan seldum við verulegt magn til Tyrklands og Mið-Asíu. Makríll er þekktur matfiskur um allan heim og ekki endilega mjög flókið að kynna hann nýjum kaupendum. Það er fyrst og síðast spurningin um verð, sem hefur lækkað verulega.“ Teitur segir að makríllinn hafi helst verið í brennidepli varðandi markaðsmálin í Rússlandi, og það þrátt fyrir að markaðurinn með loðnu sé eins viðkvæmur og raun ber vitni. Loðnuhrogn hafi t.d. skilað gríðarlegum verðmætum inn í samfélagið. „Síðan hefur verð á sjófrystum karfa snarfallið, en Rússland var langmikilvægasti markaðurinn fyrir þá afurð. En menn láta eins og þetta sé ekkert mál af því að makríllinn seldist. Ef við værum með stóra síldarkvóta værum við í miklum vandræðum því Rússland er langmikilvægasti síldarmarkaður í heimi. Það má ekki gleyma því að Rússland er eitt fjölmennasta ríki heims og fiskneysla er óvíða meiri,“ segir Teitur og bætir við að það sé sérstakt áhyggjuefni að ekki sé hægt að koma karfa í verð; hann hafi verið seldur héðan um allan heim um og eftir 1980 og því þekkt vara. Samt sé engin eftirspurn eftir karfa. svavar@frettabladid.is