Eldur kom upp í Arnarfellinu

Flutningaskipið Arnarfell er komið til Immingham á Englandi fyrir eigin vélarafli, eftir að eldur kom upp í vélarrúmi skipsins í gærkvöldi, þegar það átti 50 sjómílur ófarnar til hafnar.

Skipstjórinn lét hlutaðeigendur vita um hvernig komið var og var bjögunarskip frá bresku sjóbjörgunarsamtökunum sent að Arnarfelli og var til taks á meðan skipverjar á Arnarfelli slökktu eldinn samkvæmt viðbragðsáætlun áhafnarinnar.

Engan sakaði við slökkvistarfið en nú verður grafist fyrir um eldsupptök og tjónið metið. Að því búnu kemur í ljós hvort tafir verða á áætlun skipsins. Arnarfell siglir á vegum Samskipa, en er skráð í Færeyjum.