Segja engan raunverulegan áhuga hjá stjórnvöldum á að taka á kennitöluflakki

Kennitöluflakk veldur miklu samfélagslegu tjóni en enginn raunverulegur áhugi hefur komið fram hjá stjórnvöldum á að taka á því af einhverri festu. Uppræta þarf þennan ósóma úr íslensku atvinnulífi enda helst kennitöluflakk og svört atvinnustarfsemi gjarnan í hendur.

Þetta kemur fram í tilkynningu frá Alþýðusambandi Íslands. Sambandið segist fagna þeirri umræðu sem skapast hafi um kennitöluflakk og skattaundanskot að undanförnu og bendir á að það hafi árið 2013 boðið ráðherrum ríkisstjórnarinnar liðveislu ASÍ við að vinna bug á því.

Sjá einnig: Kennitöluflakkið kostar milljarða en ekkert frumvarp komið fram

„Alþýðusamband Íslands hefur lengi gagnrýnt andvaraleysi og ótrúlegt langlundargeð stjórnvalda gagnvart kennitöluflakki og þeim skaða sem slík starfsemi veldur. Í október 2013 lagði ASÍ fram tillögur í 16 liðum um aðgerðir til að sporna við kennitöluflakki. Tillögunum fylgdi ítarleg úttekt á kennitöluflakkinu í íslensku samfélagi og afleiðingum þess,“ segir í tilkynningunni. Tillögurnar hafi verið sendar á ráðherra.

Í nýjasta tölublaði Tíundar, rits embættis ríkisskattstjóra, er áætlað að ríkissjóður fari á mis við áttatíu milljarða króna vegna skattaundanskota á ári hverju og er kennitöluflakk hluti vandans. Ragnheiður Elín Árnadóttir iðnaðar- og viðskiptaráðherra boðaði frumvarp um aðgerðir gegn kennitöluflakki árið 2013, en enn bólar ekkert á frumvarpi. Í þingmálaskrá yfirstandandi þings hefur hins vegar verið boðað frumvarp um málið með vorinu.