Skilmálar eldsneytisútboðs gengu gegn stefnu N1 um þjónustu

Ástæða þess að olíufélagið N1 tók ekki þátt í útboði Landssambands smábátaeigenda (LS) og Sjávarkaupa í árslok með verulegt magn eldsneytis var sú að skilmálar útboðsins um viðskipti við hluta smábátasjómanna samræmdust ekki stefnu fyrirtækisins.

Eggert Þór Kristófersson, forstjóri N1, skýrir málið í svari við skriflegri fyrirspurn Fréttablaðsins, sem barst ekki í tíma fyrir birtingu á umfjöllun blaðsins í gær. Þar sagði frá tveimur útboðum, sem Sjávarkaup annaðist, á um 27.000 tonnum af eldsneyti til töluverðs fjölda smærri útgerða og smábátasjómanna.

Olís tók ekki þátt í útboðunum, en Skeljungur tryggði sér viðskiptin í báðum tilfellum. N1 sat hjá í útboði LS.

Eggert skrifar: „N1 heldur úti víðtækri þjónustu við mikinn fjölda smábátasjómanna um land allt. Stefna N1 í þessum viðskiptum hefur verið að bjóða smábátasjómönnum afsláttarkjör sem taka mið af umfangi viðskipta og aðstæðum hvers og eins viðskiptavinar, s.s. mismunandi dreifingarkostnaði og umsetningu í hverri höfn. Það var mat N1 að skilmálar umrædds útboðs um viðskipti hluta smábátasjómanna, þar sem m.a. var ekki tekið tillit til umfangs og aðstæðna hvers og eins viðskiptavinar og jafnframt kveðið á um greiðslu þóknunar til þriðja aðila fyrir milligöngu viðskipta, samræmdust ekki þessari stefnu félagsins.“

Hann bætir við að N1 „mun eftir sem áður kappkosta að bjóða viðskiptavinum sínum í hópi smábátasjómanna samkeppnishæf og sanngjörn viðskiptakjör, að teknu tilliti til raunkostnaðar við innkaup og dreifingu eldsneytis hverju sinni.“