Skar sig en send heim með svefnlyf

Dóttir Valdísar Óskar Valsdóttur var send heim með svefnlyf af Barna og unglingageðdeild í gær þegar þær leituðu þangað vegna sjálfsskaðandi hegðunar hennar. Valdís sagði sögu tólf ára dóttur sinnar í Fréttablaðinu á þriðjudag en hún reyndi sjálfsvíg fyrir einu og hálfu ári.

Í kjölfar viðtalsins hafði Barnavernd samband við Valdísi og sagði henni að hjólin væru farin að snúast í máli dóttur hennar. Það tæki tvær til sex vikur fyrir umsóknir þeirra að fara í gegnum kerfið. Dóttir hennar hefur ekki hitt geðlækni og ekki notið sálfræðihjálpar.

„Svo kemst ég að því í morgun að hún var búin að skera sig. Ég fer með hana á barnaspítalann. Læknir þar beinir okkur áfram á BUGL. Þar er komist að þeirri niðurstöðu að það sé best að koma svefninum í lag þannig að ég er send heim með svefntöflur.“

Valdís segir að þegar hún hafi brugðist illa við hafi þeim verið bent á að sækja um neyðarvistun á Stuðlum.

„En dóttir mín er ekki í vímuefnum. Hún er svo hvatvís að hún kæmi út helmingi fróðari um allt sem hún gæti gert.“ Hún segir að þegar hún hafi svo rætt við barnavernd í Reykjanesbæ hafi henni verið ráðlagt frá því að leita til Stuðla.

Valdís segist ekki vita hvers vegna dóttur sinni líði svona illa. Hún þurfi sérfræðiaðstoð því hún sé mjög lokuð og erfitt reynist að ná til hennar. Valdís viti ekki hvort dóttir sín hafi orðið fyrir áfalli en gruni að þannig gæti verið í pottinn búið.