Guðni hafnar því alfarið að vera leigupenni ferðaskrifstofu

„Hvaða vitleysa er þetta? Ég er þarna í fullri vinnu. Það er ekkert leyndarmál. Ég er fararstjóri hjá Víta og skemmtanastjóri. Og hef verið í auglýsingum hjá þeim,“ segir Guðni Ágústsson.

Guðni Ágústsson, fyrrverandi formaður Framsóknarflokksins og landbúnaðarráðherra, sætir nokkrum ávirðingum í aðsendri grein eftir Valbjörn Jónsson bakarameistara sem birtist í Morgunblaðinu undir fyrirsögninni: „Lítt dulbúin auglýsing“

Trúverðugleiki Moggans og Guðna undir

Valbjörn gerir aðsenda grein Guðna, sem birtist fyrir nokkru, „Sólin skín á Íslendinga á Kanarí“, að umfjöllunarefni, greinir hana og segir að ef frá sé tekið „málskrúð ráðherrans fyrrverandi“ standi lítið eftir í greininni „annað en lítt dulin auglýsing fyrir tiltekna ferðaskrifstofu“.

Valbjörn bakarameistari spyr hvort Guðni hafi þarna hagsmuna að gæta? „Fær hann ókeypis eða sérstaklega ódýrar ferðir með þessum aðila? Nú geng ég út frá því að hann sé ekki á launum hjá þessum ferðaþjónustuaðila. Guðni Ágústsson hefur haft margt fram að færa í þjóðmálaumræðunni síðustu áratugi. Oft er undirritaður sammála honum og því þykir mér miður að trúverðugleiki hans sé gjaldfelldur með þessum hætti. Ég hélt sannast sagna að Morgunblaðið hefði sínar siðareglur um umfjöllun af þessu tagi. En kannski ekki, og kannski er þetta innan þeirra marka sem sett eru.“

Betra að vera í sólinni en rífast við Pétur á Sögu

Guðni telur þetta fráleitt. Ekkert nýtt sé að hann skrifi um lífið og tilveruna, stundum greinar um hollustu, gegn sykri, um nauðsyn þess að hreyfa sig en liggja ekki í leti og aumingjaskap.

„Ég er í vinnu þegar ég er þarna úti, er skemmtanastjóri og held utan um fólkið sem er hjá Vita. Troðfullt út af dyrum á hverri hátíð, spila bingó, félagsvist, sagnastundir, árshátíðir, spurningakeppnir, míní-golf og allt mögulegt. Ég skrifa allskonar greinar inní Mogga enda lifandi maður með skoðanir og skap.“

Guðni segir fráleitt að greinaskrif hans í Moggann sé inni í pakkanum, sem laun til sín frá ferðaskrifstofunni. Og Guðni vill nota tækifærið og brýna eldri borgara til dáða: „Þó ég sé stundum talinn síðasti Íslendingurinn mæli ég með því við gamla fólkið að taka sér einhverjar vikur úti í staðinn fyrir að rífast við Pétur á Sögu eða horfa á þingið, fundarstjórn forseta og verða alveg ringlað.“

Guðni segir alla glaða og káta í sólinni.