Taka ákvörðun um ákæru þegar geðmat yfir Íslendingnum liggur fyrir

Saksóknari í Stafangri í Noregi mun taka ákvörðun um hvort 23 ára Íslendingur verði ákærður fyrir að hafa beitt tveggja ára íslenskt barn alvarlegu líkamlegu ofbeldi. Sú ákvörðun verður þó ekki tekin fyrr en maðurinn hefur gengist undir geðmat.

Þetta kemur fram í svari saksóknarans Unni Byberg Malmin við fyrirspurn Vísis. Gæsluvarðhald yfir manninum var framlengt um fjórar vikur á mánudaginn.

Maðurinn var upphaflega úrskurðaður í gæsluvarðhald eftir að hafa verið handtekinn þann 23. október síðastliðinn. Lögregla í Stafangri taldi líklegt að maðurinn myndi reyna að flýja land eða eyðileggja sönnunargögn sem tengdust málinu.

Var nýfluttur inn til móður barnsins

Áður hafði verið greint frá því að maðurinn væri ekki faðir bansins heldur átt í sambandi við móður þess sem einnig er íslensk. Líkamsárásin á að hafa átt sér stað í bænum Lye, skammt frá Stafangri, en maðurinn bjó þar og var nýfluttur inn til móður barnsins.

Barnið var útskrifað af sjúkrahúsi í byrjun nóvember, en Malmin segir að drengurinn sé á góðum batavegi.

Maðurinn hafði ekki áður fengið dóm í Noregi en hlaut átján mánaða fangelsisdóm fyrir líkamsárás hér á landi árið 2012.