Íslenska fótboltalandsliðið spilar á heimavelli Gerrard

Jürgen Klinsmann, þjálfari bandaríska landsliðsins í fótbolta, hefur valið 23 manna æfingahóp fyrir æfingabúðir frá 11. janúar til 6. febrúar.

Bandaríska landsliðið mætir því íslenska 31. janúar en um leið og hópurinn var tilkynntur þá staðfesti bandaríska knattspyrnusambandið að leikurinn við Ísland muni fara á StubHub Center í Carson en það er heimavöllur Steven Gerrard og félaga í Los Angeles Galaxy.

Aron Jóhannsson, Íslendingurinn sem valdi að spila fyrir Bandaríkin, verður ekki með í þessum leikjum því auk þess að vera meiddur þá eru bara leikmenn sem spila í Bandaríkjunum valdir í hópinn.

Landsleikirnir við Ísland (31. janúar) og Kanada (5. febrúar) fara fram utan alþjóðlega landsleikjadaga og því eru leikmenn sem spila í Evrópu ekki með.

Jürgen Klinsmann velur samt mjög sterkan hóp enda spila nær allar stjörnur bandaríska liðsins í MLS-deildinni. Menn eins og Jozy Altidore, Michael Bradley og Jermaine Jones verða því væntanlega með í leiknum á móti Íslandi.

Þessar árlegu æfingabúðir bandaríska landsliðsins standa yfir í nær einn mánuð og liðið færi því mikinn tíma saman fyrir leikinn við Ísland. Þegar kemur að þeim leik hefur liðið æft í tuttugu daga saman.



Bandaríski landsliðshópurinn:

Markverðir (2): Bill Hamid (D.C. United), Luis Robles (New York Red Bulls).

Varnarmenn (7): Kellyn Acosta (FC Dallas), Matt Besler (Sporting Kansas City), Matt Miazga (New York Red Bulls), Eric Miller (Montreal Impact), Tim Parker (Vancouver Whitecaps FC), Marc Pelosi (San Jose Earthquakes), Matt Polster (Chicago Fire).

Miðjumenn (8): Fatai Alashe (San Jose Earthquakes), Michael Bradley (Toronto FC), Mix Diskerud (New York City FC), Jermaine Jones (Unattached), Darlington Nagbe (Portland Timbers), Lee Nguyen (New England Revolution), Tony Tchani (Columbus Crew SC), Wil Trapp (Columbus Crew SC).

Sóknarmenn (6): Jozy Altidore (Toronto FC), Ethan Finlay (Columbus Crew SC), Jerome Kiesewetter (VfB Stuttgart), Jordan Morris (Unattached), Khiry Shelton (New York City FC), Gyasi Zardes (LA Galaxy).