Febrúarspá Siggu Kling – Meyja: Getur og ert meira en þú heldur!

Elsku meyjan mín. Það er svo margt búið að vera gerast í kortunum þínum undanfarna mánuði og það er sko ekki hægt að segja að þú hafir læðst í gegnum þá!

Þú hefur sama hugrekki og býflugan, því samkvæmt lögmálinu ætti hún ekki að geta flogið en hún gerir það bara samt. Það er eins með þig, þú lætur þig hafa það sem þú ættir ekki að geta gert og núna munt þú ekki láta neinn stöðva þig. Þetta á sérstaklega við í vinnumálum og því sem þú ert að fást við og þar eru mjög spennandi hlutir að gerast en þú þarft að hafa yfirráðin algjörlega sjálf, hvernig þú ætlar að haga þínum vinnutíma og hafa þetta allt saman.

Það er svo mikill kraftur yfir þér, bæði til þess að breyta vinnunni þinni eins og þú vilt hafa hana og mundu að nám getur líka verið vinna.

Það er líka einhver spurning um nýtt húsnæði og flutninga og við það verður mikið að gera en hafðu það hugfast að það mun á endanum gera lífið einfaldara.

Þú ert komin vel á veg með að öðlast það sem þú vilt í lífinu og núna færðu skilaboð um að herða þig enn frekar í því og vera sjálfstæð í öllu og mundu að þú hefur hugrekki býflugunnar!

Þú þarft að hætta að setja aðra á svona mikinn stall í kringum þig og sjá sjálfan þig á þessum stalli. Því þú getur og ert meira en þú heldur. Þetta er mikill mánuður sem þú ert að fara inn í núna og þú ert algjörlega reiðubúin til þess að takast á við hann.

Núna snýst ástin um trygglyndi og stöðugleika og það er bara þannig týpa sem þú ert elsku hjartans meyjan mín.

Með ást og umhyggju, þín Sigga Kling

Frægar meyjur: Ragna Lóa Stefánsdóttir íþróttakona, Manúela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður.