Sögunni haldið á lofti

„Við erum að fagna áttatíu ára afmæli skólans með ýmsum hætti,“ segir Sigríður Heiða Bragadóttir, skólastjóri Laugarnesskóla. „Í raun átti hann afmæli í október síðastliðnum og þá var afmælisveisla hjá krökkunum, þau bökuðu risaköku, gerðu kórónur og við fórum í skrúðgöngu. 

En í dag stendur hverfishátíðin Laugarnes á ljúfum nótum frá klukkan 13 til 16.  Jón Freyr Þórarinsson, fyrrverandi skólastjóri, setur hátíðina og við vonum að gamlir nemendur og kennarar mæti. Við verðum með opið hús og það verður morgunsöngur á klukkutíma fresti sem fólk er hvatt til að taka þátt í.“

  Hinn daglegi morgunsöngur er ein af föstum hefðum Laugarnesskóla, og skiptast tveir tónmenntakennarar á að spila undir og syngja, segir Sigríður Heiða. 

„Það er gömul venja að skólastjórinn stýri morgunsöngnum og ég geri það þó ég sé gersamlega laglaus,“ segir hún hlæjandi. „Dans er líka hátt skrifaður í skólanum, Jón Freyr kom þeirri hefð á fyrir áratugum.“

Fjölbreytt þemaverkefni, tengd afmælinu, hafa einkennt starfið undanfarna daga í Laugarnesskóla og sögu skólans og hverfisins verið haldið á lofti, að sögn Sigríðar Heiðu.

 „Börnin hafa lært um gömul verkfæri, listaverkin á veggjunum, uppstoppuðu dýrin og ýmsa muni sem eru í sýningarkössum og allir eru farnir að líta á sem sjálfsagða hluti.“

Skólahald Laugarnesskóla hófst 19. október 1935, það haust gekk mænuveiki­faraldur í bænum og því var skólabann sett á um tíma. En 214 börn á aldrinum átta til þrettán ára sóttu skólann fyrsta veturinn og tíu kennarar sáu um uppfræðsluna. Þá var heimavist þar líka.

Tvívegis hefur verið byggt við upphaflega skólahúsið og í haust verður að bæta við lausum kennslustofum vegna fjölgunar nemenda. Þeir eru um 500 núna en voru um 1.800 þegar þeir voru flestir, þá var skólinn líka þrísetinn. Árið 1969 varð Laugarnesskólinn bara barnaskóli þegar Laugalækjarskóli hafði verið byggður fyrir gagnfræðastigið.

Greinin birtist fyrst í Fréttablaðinu 28. maí 2016.