Marsspá Siggu Kling – Bogmaður: Orkan er að komast í lag

Elsku stolti bogmaðurinn minn. Þú ert svo aðlaðandi og kærleiksríkur og vilt öllum svo vel.

Það er mikið búið að vera svo margt að gerast í kringum þig og ótrúlegustu tilfinningar eru búnar að klukka þig en nú ert þú farinn að finna að þú hefur fast land undir fótum.

Þú ert kominn á það tímabil að andi velfarnaðar sveimar um allt í kringum þig og þú finnur að orkan þín er að komast í samt lag.

Þú getur klappað þér á öxlina fyrir dugnaðinn og sagt: Mikið er ég stolt/ur af þér. Þú verður örlítið pirraður yfir því að allt sé ekki að ganga alveg hundrað prósent. En að hafa alla hluti hundrað prósent er eitthvað svo leiðinlegt elskan mín og þú þarft alltaf að hafa svolitla spennu í kringum þig. Þér fer best að vera á tánum því þá skapar þú miklu skemmtilegri ævisögu.

Þó að aðrir séu ekki að skora á þig þá þarf þú bara að gera það sjálfur minn kæri! Góð tjáskipti eru lykillinn að velfarnaði og þú þarft að segja skýrt hvernig þú vilt hafa hlutina því að fólk í kringum þig les ekki hugsanir þínar!

Um leið og þú trúir að þú getir breytt lífinu þínu þá ertu hálfnaður. Þægindahringurinn er eitthvað sem þú þarft að henda. Og þú munt sjá hæfileikana þína miklu skýrar og betur þegar þægindahringurinn er farinn á brott.

Í ástinni er mikilvægt fyrir þig að leita að traustum elskhuga sem að dáir þig en lætur þig samt vera pínulítið á tánum. Það er nefnilega þetta með spennuna elskan mín, þú þarft að hafa smá svoleiðis í kringum þig!

Ævintýrin eru að hrannast upp og haltu ótrauður áfram að hafa svona góð áhrif á fólkið í kringum þig, því að þetta er fólkið sem að á eftir að rétta fram hjálparhönd.

Frægir bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa hönnuður hjá Kjólar og konfekt.