Lífið eftir prófin

Djammarinn



- Rapp í Reykjavík hátíðin

Um næstu helgi fer tónlistarhátíðin Rapp í Reykjavík framá Húrra þar sem nokkrir af vinsælustu tónlistarmönnum landsins munu spila og Djammarinn getur varla látið sig vanta þar.

- RVK Soundsystem

Sömu helgi verður RVK Soundsystem kvöld á Paloma á Laugardeginum og Djammarinn gæti auðveldlega læðst útaf Húrra og skroppið yfir á þetta sívinsæla fastakvöld.

- Logi Pedro á Prikinu

Djammarinn verður að skella sér á Prikið og upplifa Loga Pedro á heimavelli sem er nánast trúarleg upplifun. Allir djammarar landsins verða þarna.

- Flöskuborð á B5

Djammarinn er kannski fátækur námsmaður en hann þekkir aðra djammara sem leggja í púkk fyrir VIP-reynsluna á B5.

Útivistartýpan

- Ganga Laugaveginn

Útivistartýpan gæti nýtt sér allan frítímann sinn og látið loks verða af því að ganga Laugaveginn, en þetta er auðvitað ein besta gönguleið heimsins.

- Sjósund

Eftir mikið stress og lítinn svefn prófatarnarinnar er gott að skella sér út í sjó og kæla sig niður.

- Snorkla í Silfru

Ef Nauthólsvíkin er ekki nógu mikil náttúra fyrir Útivistartýpuna gæti verið gott að skella sér í snorkl í Silfru, upplifun sem Útivistartýpan getur sko ekki látið fram hjá sér fara.

- Brimbretti

Fólk er víst farið að skella sér á brimbretti hér á landi og Útivistartýpan má nú ekki láta það hjá líða, auk þess sem það sameinar sjósund, snorkl og adrenalínfíknina.

Íþróttafríkið

- Námskeið í ólympískum lyftingum

Lyftingar verða sífellt vinsælli eins og Íþróttafríkið veit vel. Það væri því ekki vitlaust að skella sér á námskeið í ólympískum lyftingum til að færa áhugann á næsta stig.

- BJJ

Íþróttafríkið þarf að prófa allt og brasilískt jiu jitsu er tiltölulega ný íþrótt í hugum fólks hér á landi. Það væri tilvalið að skella sér í Mjölni eftir prófatíðina og láta nokkra tappa út.

- Hjólreiðar

Það virðast allir vera í spandexgalla á hjóli í dag og er það alveg kjörið fyrir Íþróttafríkið. Nokkrir kílómetrar eftir síðasta próf og málið er dautt.

- Jóga

Það væri ekki vitlaust að skella sér í jóga eftir prófin - Íþróttafríkið elskar að taka á því en eftir prófatörn getur verið gott að taka einn eða tvo jógatíma til að koma hausnum niður á jörðina.

Innipúkinn

- Loksins klárað House of Cards

Innipúkinn mun grafa sig undir teppi og horfa á House of Cards eða Better Call Saul í nokkra sólarhringa samfleytt.

- Bað

Hvað er betra en lavenderolía og kertaljós í sjóðheitu baðkarinu? Ekki skemmir fyrir að hafa einn kaldan sér við hlið.

- Lesa góða bók

Innipúkinn getur loksins lesið allar bækurnar sem hann fékk í jólagjöf, Tappi á himninum eftir Evu Rún Snorradóttur er góð byrjun t.d.

- Vafrað stefnulaust á netinu

Loksins getur Innipúkinn aflétt internetbanninu sínu og skrollað niður tímalínuna klukkustundum saman.

Nautnaseggurinn

- Nudd

Nautnaseggurinn er allur stífur og bólginn eftir prófstressið og þarf að láta nudda það úr sér.

- Bláa lónið

Nautnaseggurinn er auðvitað búinn að panta pláss í lóninu og verður þar í góðu yfirlæti beint eftir síðasta próf.

- Sælkerabúð

Hvað er betra en að gera vel við sig með góðum mat? Frú Lauga, Jóhannsen Deli og fleiri eðalstaðir eru gjörsamlega tilvaldir fyrir Nautnasegginn.

- Tana á sundlaugarbakkanum

Það er algjörlega klassískt að nýta sér allar þessar frábæru sundlaugar sem Reykjavík hefur að bjóða og Nautnaseggurinn er mættur um leið og sólin fer að skína.