Umtalsvert tjón eftir bruna í Hveragerði

Eldur kom upp í garðyrkjustöð í Hveragerði á tíunda tímanum í gærkvöldi. Um er að ræða 3000 fermetra garðyrkjustöð þar sem ræktaðar eru rósir undir raflýsingu. Á vef Brunavarna Árnessýslu kemur fram að ljóst hafi verið þegar slökkviliðsmenn mættu á svæðið að tjón yrði umtalsvert.

Eldur logaði í tengibyggingu í miðri garðyrkjustöðinni og voru öll gróðurhúsin full af reyk. Talsverðan tíma tók fyrir slökkviliðsmenn að ráða niðurlögum eldsins þar sem erfitt var að komast að rótum hans.

Skemmdir á rafbúnaði garðyrkjustöðvarinnar eru miklar og má gera ráð fyrir því að ræktunartjón verði allnokkuð þó slökkviliðsmenn séu ekki tilbúnir að fullyrða um það á þessari stundu. Slökkvistarfi lauk um klukkan hálfeitt í nótt en að því komu bæði slökkviliðsmenn úr Hveragerði og Selfossi.