Fimm látnir í skothríð í garðveislu

Fimm eru látnir og þrír særðir eftir skotárás í garðveislu sem fram fór í bæ nálægt bandarísku borginni Pittsburgh í nótt. Fjórar konur og einn karl liggja í valnum og árásarmennirnir ganga enn lausir að því er fram kemur í bandarískum miðlum.

Tveir hinna særðu eru í lífshættu þannig að tala látinna gæti hækkað enn frekar. Svo virðist sem tveir byssumenn hafi rutt sér leið inn í veisluna og hafið þar skothríð í allar áttir áður en þeir létu sig hverfa.

Samkvæmt frétt ABC News segist lögreglan viss um að árásarmennirnir voru minnst tveir, þar sem minnst tvær tegundir skotfæra fundust á vettvangi. Þá segir lögreglan ljóst að enginn úr veislunni hafi skotið til baka á árásarmennina.

Ekkert er vitað um ástæðu árásanna að svo stöddu.