Lítil eftirspurn eftir græðgi og baktjaldamakki

Fjármálaráðherra segir fyrirætlanir tryggingafélaganna um milljarða arðgreiðslur  áminningu um að atvinnulífið eins og aðrir í samfélaginu þyrftu að taka þátt í að auka traust í samfélaginu á nýjan leik. Stjórnir stærstu tryggingafélaganna ákváðu í dag að lækka greiðslurnar um fimm og hálfan milljarð.

Fjármálaráðherra og þingmenn fögnuðu því í umræðum á Alþingi í dag að tryggingafélög hefðu ákveðið að lækka arðgreiðslur sínar.

Steingrímur J. Sigfússon, þingmaður Vinstri grænna,  hóf umræðuna og sagði upprunaleg áform tryggingafélaganna sýna endurreisn græðgisvæðingarinnar í þjóðfélaginu.

„Ég held að menn ættu að átta sig á því í viðskiptalífinu á Íslandi að það er lítil eftirspurn eftir græðginni og það er lítil eftirspurn eftir baktjaldamakki og sölu hluta til vildarvina í lokuðu ferli og öðrum slíkum hlutum. Viðbrögðin undanfarnar vikur og mánuði hafa sýnt það og það er vel, því það veitir greinilega ekki af að veita aðhald,“ sagði Stengrímur.

Stjórn Sjóvar leggur til að arðgreiðslur lækki um rúma 2,4 milljarða og stjórn VÍS að þær lækki um þrjá milljarða. Steingrímur segir að engu að síður ætli félögin að greiða út sem svari til alls hagnaðar þeirra á síðasta ári. Tryggingafélögin hefðu einnig vísað til Evróputilskipunar sem ekki hefði tekið gildi.

Bjarni Benediktsson fjármálaráðherra sagði þetta mál áminningu um að atvinnulífið áttaði sig áþví að allir þyrftu að standa saman í að endurheimta traust í landinu.

„Traust á milli almennings og atvinnustarfseminnar, traust á milli kjósenda og stjórnmálaflokka, kjósenda og Alþingis,  á eftirlitsstofnunum og svo framvegis. Okkur miðar ágætlega á mörgum sviðum en atvinnulífið og vinnumarkaðurinn í heild sinni verður líka að skila sínu í þeirri umræðu,“ sagði Bjarni. Það gengi ekki upp að hækka iðgjöld á lögbundnum tryggingum og taka út á sama tíma margra ára uppsafnaðan arð.

Fleiri þingmenn tóku undir sjónarmið Bjarna og Steingríms en þó ekki allir. Sigríður Andersen sagðist ekki ætla að taka undir vanþóknun innan og utan þings á tryggingarfélögunum, eða taka þátt í geðshræringum og stóryrðum. Það þyrfti líka að huga að eigendum tryggingafélaganna nú þegar lækka ætti arðgreiðslurnar.

„Hver hefur talað máli sjóðsfélaga lífeyrissjóðanna sem verða hér af greiðslu, ríkissjóður af 420 milljóna arðgreiðslu við þessa ákvörðun ef hún raungerist. Hver ætlar að tala máli sjóðsfélaganna í lífeyrissjóðunum í þessu máli,“ spurði Sigríður Andersen á Alþingi í dag.