Veisla fyrir öll skynfærin

Guðríðarhátíð Söngfjelagsins verður haldin í Læknaminjasafninu á Seltjarnarnesi næsta laugar­dag þar sem boðið verður upp á tónlistar- og fjölmenningarlegt ferðalag á slóðir Guðríðar Símonardóttur og annarra Íslendinga sem rænt var héðan í Tyrkjaráninu árið 1627.

Tónlistin verður fyrir­ferðarmikil á hátíðinni þar sem unnið er með samhljóm í íslenskri og arabískri tónlist en matargerðin fær líka sitt pláss. Sett verður upp tyrkneskt kaffihús, Horizon Cafe, undir stjórn Derya Özdilek, formanns Horizon – menningarfélags múslima, þar sem gestum verður boðið upp á úrval gómsætra rétta og drykkja. „Við höfum reglulega slegið upp tyrknesku kaffihúsi á viðburðum félagsins og þau hafa alltaf slegið í gegn. Um helgina ætlum við að bjóða upp á fjóra sæta eftirrétti og sex bragðmikla aðalrétti.“

Eftirréttirnir sem boðið verður upp á eru allir mjög vinsælir í Tyrklandi að sögn Derya. „Þrír þeirra innihalda sýróp og sá fjórði er búinn til úr mjólk og hrísgrjónum. Sannarlega bragðgóðir og skemmtilegir réttir fyrir flesta Íslendinga.“

Vel kryddaðir

Íslendingar kunna einnig vel að meta aðalréttina sem í boði verða að sögn Derya. „Þessir réttir hafa verið mjög vinsælir á viðburðum okkar undanfarið. Við munum t.d. bjóða upp á Sarma, sem eru vínviðarlauf fyllt með hrísgrjónum. Annar ljúffengur og vinsæll réttur er Mercimek köftesi, sem er nokkurs konar linsubaunapaté. Þar nota ég sérvalin tyrknesk krydd, búlgúr og rauðar linsubaunir. Einnig munum við bjóða upp á tvær gerðir af salati, einn brauðrétt og ljúffenga súpu sem borin er fram með brauði. Allt vel kryddaðir og spennandi réttir.“

Fjölmargir viðburðir verða á hátíðinni. Meðal þeirra er fyrirlestur Steinunnar Jóhannesdóttur rithöfundar um ferðalag Guðríðar, flutt verður frásögn afkomanda Grindavíkurfjölskyldunnar sem einnig var rænt ásamt söng- og dansatriðum þar sem Megas og Ragnheiður Gröndal munu m.a. koma fram.

Hátíðin stendur yfir frá klukkan 12.30 til 18.00 næsta laugardag. Hægt er að kaupa sérstakan hátíðar­miða á 1.500 kr. fram til kl. 15 sem gildir á alla viðburði dagsins. Eftir það kostar miðinn 2.000 kr. Ókeypis aðgangur er fyrir börn, eldri borgara, öryrkja og forsetaframbjóðendur.

Nánari upplýsingar má finna á Facebook undir Guðríðarhátíð Söngfjelagsins.