Segir byggingarlistina verða að þróast eðlilega

Formaður Arkitektafélagsins telur forsætisráðherra ekki beita valdi sínu með réttum hætti þegar kemur að byggingarlist. Skilyrði um að gamlar teikningar séu notaðar á Alþingisreitnum og ummæli hans um Hafnartorgsreitinn séu ekki í takt við stefnu Arkitektafélagsins.

Hafnar eru framkvæmdir á Hafnartorgsreit þar sem byggja á sjö hús. Ekki er búið að hanna húsin heldur er aðeins um skipulagstillögu að ræða. Forsætisráðherra hefur sagt það skipulagsslys. Huga þurfi að gömlum húsum í bænum og skipuleggja reitinn út frá því. Reiturinn væri sá mikilvægasti í elstu byggð Reykjavíkur og ætti því að huga að samhenginu við skipulag reitsins.

„Forsætisráðherra er vitaskuld frjálst hafa þá skoðun sem hann vill. Öll umræða er einnig af hinu góða og gott að ræða þessi mál. Það er hins vegar hvernig hann beitir valdi sínu, með Alþingisreitinn til dæmis, sem við setjum spurningamerki við,“ segir Aðalheiður Atladóttir, formaður Arkitektafélagsins. „Við ættum í dag að skapa og hanna byggingar sem verða menningararfur seinna meir. Við ættum að nota tækifærið núna og gera eitthvað framsækið í byggingarlist. Byggingarlist verður að fá að þróast líkt og aðrar listgreinar.“

Bendir Aðalheiður á að vinnuferlið við byggingu húsa sé á þá leið að útlit hússins komi í lokin. Fyrst sé unnið í rannsóknum á húsinu, þarfagreiningu, skoðun umhverfis sem síðan leiðir af sér útlit. „Á Alþingisreitnum er hins vegar sett skilyrði í fjárlögum að unnið sé eftir gamalli teikningu eða hún sé höfð til viðmiðunar og það samrýmist ekki okkar stefnu.“

Aðalheiður bendir á að ekki sé hægt að binda list í einhvers konar tímafjötra „Ég gæti tekið tónlist til dæmis. Sjáum Björk og Of Monsters and Men sem eru að skapa í dag sem verður líkast til hluti af tónlistararfinum. Við ættum ekki að skikka þau til að semja tónlist í anda gamalla tíma vegna þess að lítið sé til af þeirri tónlist.“