Fær ekki bætur vegna stórfelldrar líkamsárásar því hann var þátttakandi í slagsmálunum

Héraðsdómur Reykjavíkur hafnaði í gær bótakröfu manns sem varð fyrir stórfelldri líkamsárás að morgni nýársdags 2011 en hann krafðist bóta úr heimilistryggingu Andra Vilhelms Guðmundssonar sem dæmdur var í fjögurra ára fangelsi vegna árásarinnar.  

Fram kemur í dómnum að málsaðilum beri að mestu leyti saman um málsatvik en umrædd líkamsárás lýsti sér í því að Andri Vilhelm veittist að manninum sem fór fram á bætur nálægt Hótel 1919 í Hafnarstræti. Sparkaði Andri í manninn þannig að hann féll í gangstéttina og sparkaði síðan ítrekað í höfuð hans og líkama þar sem hann lá í götunni.

Afleiðingar árásarinnar urðu meðal annars þær að maðurinn hlaut lífshættulegan höfuðáverka og var han metinn 15 prósent öryrki í september 2012.

Að mati dómsins á maðurinn þó ekki rétt á bótum úr heimilistryggingu Andra þar sem framburður vitna í sakamálinu sem höfðað var vegna árásarinnar þykir sanna að maðurinn hafi tekið þátt í slagsmálunum sem leiddu til áverkanna sem hann svo hlaut.

Þar með hafi hann fyrirgert rétti sínum til bóta samkvæmt skilmálum heimilistryggingar Andra Vilhelms og er í dómnum vísað í lög um vátryggingarsamninga „sem setja því ekki skorður að samið sé um ábyrgðartakmarkanir af þessu tagi þar sem vátryggingartaki hefur stofnað til aukinnar áhættu á tjóni með tiltekinni hegðun.“

Þá er í dómnum vísað í framburð vitna fyrir héraðsdómi við aðalmeðferð sakamálsins þar sem þau lýstu því að hafa „gengið fram á átök,“ eða séð tvo menn í „slagsmálum.“

„Með vísan til merkingar orðanna „átök“ og „slagsmál“ samkvæmt almennri málvenju, verður að leggja þann skilning í framburð þessara vitna að stefnandi hafi umrædda nýársnótt sjálfur tekið ákvörðun um að fljúgast á við árásarmanninn með hætti sem einskorðaðist ekki við nauðsynlega vörn gagnvart árásinni og þannig tekið aukna áhættu á að verða fyrir líkamstjóni,“ eins og segir í dómi héraðsdóms.

Var tryggingafélag Andra því sýknað af bótakröfu mannsins.