Síminn uppfærir farsímakerfið

Síminn hefur gert nýjan fimm ára samstarfssamning við tæknifyrirtækið Ericsson um frekari útbreiðslu og öflugra farsímanet Símans hér á landi. „Samhliða uppsetningu 4G LTE-snjallsenda verður farsímakerfið allt uppfært til að tryggja uppbyggingu netkerfis á heimsmælikvarða,“ segir í tilkynningu. Ericsson leggur til allan fjarskiptabúnað og sameiginlegt miðlægt kerfi farsíma.

Haft er eftir Orra Haukssyni, forstjóra Símans, að Ericsson sé einn mikilvægasti samstarfsaðili Símans til áratuga. „Með þessum samningi tryggjum við áframhaldandi öflugt og sveigjanlegt samstarf í þágu neytenda,“ segir hann.

Þá kemur fram að 40 prósent af allri farsímaumferð í heiminum fari um netkerfi frá Ericsson, en það sé tvöfalt meira en næsti keppinautur státi af.