Grátlegt jafntefli Bergrischer

Arnór Þór Gunnarsson, Björgvin Páll Gústavsson og félagar í Bergrischer gerðu grátlegt jafntefil við FRISCH AUF! Göppingen í þýsku úrvalsdeildinni í handbolta. Göppingen jafnaði á lokasekúndu leiksins. 28-28, lokatölur.

Bergrischer byrjaði betur og leiddi meðal annars 4-3 þegar átta mínútur voru liðnar af leiknum. Svo tóku gestirnir frá Göppingen völdin og leiddu meðal annars 17-12 í hálfleik.

Í síðari hálfleik snerist dæmið. Bergrischer gekk á lagið og náðu forystunni þegar ein og hálf mínúta var eftir af leiknum. Bjögrvin Páll varði svo mikilvæga bolta undir lokin, en hann náði ekki að verja lokaskotið. Manuel Späth jafnaði metinn í þann mund sem tíminn rann út og lokatölur 28-28.

Kristian Nippes var markahæstur hjá Bergrischer með átta mörk, en Arnór Þór Gunnarsson skoraði fimm. Björgvin Páll Gústavsson varði átta skot samkvæmt heimasíðu þýska sambandsins, en sú tölfræði er oft ekki á rökum reist.

Anton Halén var markahæstur hjá Göppingen með fimm mörk, en margir leikmenn lögðu lóð sín á vogaskálarnar þar.