"Heims um ból“ í hjarta þúsunda kirkjugesta á jóladag

Það viðraði vel til messuhalds á höfuðborgarsvæðinu í dag og vel mætt í margar þeirra. Í Landakotskirkju fóru fram messur á nokkrum tungumálum en biskup Íslands átti hins vegar ekki heimangengt vegna flensu.

Þúsundir manna sóttu guðsþjónustur í kirkjum landsins í dag og í Hallgrímskirkju var full út úr dyrum í hátíðarmessu sem hófst klukkan tvö. Biskupinn yfir Íslandi, Agnes M. Sigurðardóttir,  lá hins vegar heima í flensu.

„Ég er nú aðeins komin með röddina aftur. En það er bara rétt að koma í mig rödd aftur núna,“ sagði Agnes í hádegisfréttum Bylgjunnar í dag. Það mætti því segja að vegir Guðs væru órannsakanlegir.

„Og það er dálítið merkilegt líka að hugsa til þess að jólin koma í raun og veru til allra,  hvort sem þeir eru kristinnar trúar eða ekki,“ bætti hún við.

Í dómkirkjunni hljóp séra Sveinn Valgeirsson í skarðið fyrir Agnesi en hún segir presta hafa mikið að gera yfir jólahátíðina, sérstaklega á landsbyggðinni þar sem hver og einn sinni mörgum kirkjum.

Í dómkirkju kaþólska á Landakoti voru fjórar messur í dag á íslensku, pólsku, litháísku og ensku.Í hátíðarmessunni í Hallgrímskirkju þjónaði og predikaði séra Irma Sjöfn Óskarsdóttir þar sem einnig mátti sjá fólk af mörgum þjóðernum. Mótettukór Hallgrímskirkju söng meðal annars sálminn fallega sem tilheyrir jólunum meira en flestir aðrir sálmar, Heims um ból, sem sjá má í sjónvarpsfréttinni hér að ofan.