Félagsvinnan skemmtileg

?Við vildum gefa veglega gjöf á þessu ári af því að klúbburinn á merkisafmæli og komumst að því að Reykjalund vantaði göngubretti. Það gagnast vel við endurhæfingu sjúklinga og okkar markmið er alltaf að láta gott af okkur leiða,? segir Friðjón Hallgrímsson, forseti Kiwanisklúbbsins Jörfa.

Spurður út í önnur styrktarverkefni klúbbsins nefnir hann ABC barnaþorp, reiðhjólahjálma til allra sex ára skólabarna og stuðning við langveik börn og fjölskyldur þeirra. ?En stóra verkefni Kiwanishreyfingarinnar á alþjóðavísu er að útrýma stífkrampa.?



Friðjón segir þrjátíu félaga í Jörfa og sjálfur hefur hann talist til þeirra í tæp fimm ár.

?Ég er bara búinn að vera stutt miðað við marga aðra. Tveir af þeim sem stofnuðu klúbbinn árið 1975 eru enn starfandi,? segir hann.

En hvaðan kemur nafnið? ?Klúbburinn er nefndur eftir landsvæðinu Jörfa, sem er í kringum Húsgagnahöllina. Hann var nefnilega stofnaður í Árbænum. Svo hafa félagarnir dreifst víða um efri byggðirnar í Austurborginni. Ég er einn vestan Elliðaáa.?

Friðjón segir þó hvorki búsetu né önnur skilyrði sett fyrir inngöngu félaga í klúbbinn.

?Jörfafélagar þurfa að vera félagslyndir auk þess að vera heiðarlegir og áhugasamir um velferð þeirra sem minna mega sín.?

Starfið byggist sem sagt á að gera góðverk en til að geta látið eitthvað af hendi rakna þarf að afla fjár.

 ?Við finnum okkur fjáröflunarverkefni, seljum konudagsblóm sem við keyrum út að morgni konudags, seljum sælgæti fyrir jólin og höldum sviðaveislur,? nefnir Friðjón sem dæmi.

?

Við gerum allt saman, hvort sem það er að dreifa blómum, tveir og tveir, pakka sælgætinu eða svíða sviðin og slík félagsvinna er alltaf skemmtileg.?



Félagsfundir eru tvisvar í mánuði og stjórnin fundar mánaðarlega og leggur línurnar, að sögn forsetans.

?Svo eru ýmsar nefndir sem sjá um sína hluti. Starfið er mjög kerfisbundið og þannig náum við árangri.?

Til skemmtunar og fróðleiks segir Friðjón hina ýmsu fyrirlesara fengna á fundi einu sinni í mánuði og stundum farið í ferðalög.

?Um síðustu helgi héldum við fund og árshátíð á Hótel Á að Kirkjubóli í Hvítársíðu í Borgarfirði,? upplýsir hann. ?Það var mjög notalegt og andi skáldsins Guðmundar Böðvarssonar sveif yfir vötnum.?