Sirkusinn er fyrir alla

„Vefritið er rekið af meistaranemum við Íslensku og menningardeild Háskóla Íslands með áherslu á grasrótarumfjöllun og leik með formið,“ segir Sigríður Nanna Gunnarsdóttir, ritstjóri og einn af stofnendum veftímaritsins Sirkústjaldsins sem fagnar eins árs afmæli í dag.

Hún segir hugmyndina að tímaritinu hafa kviknað vegna þess hversu lítið var um menningarumfjöllun á Íslandi og nemendur því ákveðið að taka málin í sínar hendur og fá þeir vinnuna við tímaritið metna til eininga í háskólanum.

Í kvöld verður afmælinu fagnað á Loft Hosteli. „Við ætlum að taka það fyrir sem við tökum fyrir í tímaritinu, við erum sirkustjald og þar kemur öll menning saman,“ segir Sigríður Nanna glöð í bragði og bætir við: „Sirkusinn er fyrir alla og menningin á líka að vera fyrir alla.“

Fjölbreytt dagskrá verður í tilefni afmælisins og mun myndlistarkonan Þórdís Erla Zoëga sýna myndlist, meðlimir í félagi meistaranema í ritlist, Blekfjelagsins, flytja upplestur og tónlistarmaðurinn Teitur Magnússon spilar nokkur lög. „Við erum voða hress, það verða líka hátíðarræður og kennarar sem koma og stíga á stokk,“ segir Sigríður Nanna að lokum.

Herlegheitin hefjast klukkan átta á Loft Hosteli, Bankastræti 7, og eru léttar veitingar í boði.