Orkuþurrð í vegi milljarða fjárfestingar

„Ég hef verulegar áhyggjur af raforkuflutningskerfinu hingað inn á Eyjafjarðarsvæðið og þeim takmörkunum sem því fylgja,“ segir Bjarni Th. Bjarnason, sveitarstjóri Dalvíkurbyggðar, en takmörkuð flutningsgeta mun að óbreyttu standa í vegi uppbyggingar sænsks fyrirtækis sem hefur lýst ríkum vilja til að byggja þurrkví til niðurrifs skipa og endurvinnslu á málmum.

Um er að ræða fyrirtækið TS Shipping, en forsvarsmenn fyrirtækisins komu að máli við sveitarstjórnarfólk í Dalvíkurbyggð í maí og lýstu yfir áhuga á að setja á laggirnar iðnaðarfyrirtækið. Helsti kosturinn sem er til skoðunar er atvinnulóð á Hauganesi.

„Það hafa verið viðræður í gangi allt þetta ár við TS Shipping og við vitum nokkurn veginn hver áform þeirra eru. Þeir hafa hitt fulltrúa Landsvirkjunar og sagt þeim hver þeirra orkuþörf er fyrir svona starfsemi en þegar maður kynnir sér upplýsingar um flutningsgetu raforku hingað þá kemur í ljós að hún er afar takmörkuð og getur sett áform sem þessi í uppnám,“ segir Bjarni.

Hann sagði á aðalfundi Samorku á dögunum að orkuþörf TS Shipping væri 10 MW og fyrirtækið vildi m.a. byggja upp sína eigin höfn. Fullbúin verksmiðja eftir þeirra hugmyndum þýðir um 120 störf og fjárfestingin yrði um það bil 17 milljarðar íslenskra króna. Helst er til skoðunar atvinnulóð á milli Hauganess og Brimness, en þar er mjög aðdjúpt og aðstæður henta því vel.

Verkefnið verið í þróun í þrjú ár

DB blaðið, fréttamiðill Dalvíkurbyggðar, fjallaði um málið á miðvikudag. Í umfjöllun blaðsins kemur fram að umsvifin séu mikil. Um 40 hektara lóð hefur verið nefnd, en til samanburðar krefst 250.000 tonna álver á Bakka við Húsavík 90 hektara iðnaðarlóðar.

Verkefnið hefur verið í þróun í þrjú ár og hafa aðstæður hérlendis verið þaulkannaðar. Þegar skipulagsmál og hönnunarvinna er að baki tæki tvö til þrjú ár að byggja verksmiðjuna.

Í fullum rekstri næmi endurvinnsla á stáli allt að 600.000 tonnum á ári, sem jafngildir niðurrifi á um 60 skipum – og koma öll skip til greina í verksmiðju af þeirri stærð sem fyrirhuguð er, eða frá herskipum til togskipa.

Verkfræðistofan Mannvit vinnur nú umhverfisskýrslu sem Skipulagsstofnun gaumgæfir og ákveður hvort verkefnið þurfi í umhverfismat.



Fengu ekki inni á Grundartanga af umhverfisástæðum

TS Shipping nálgaðist stjórn Faxaflóahafna í fyrra með uppbyggingarhugmyndir fyrir þurrkvína á Grundartanga sem fékk ekki hljómgrunn. Voru nefndar ýmsar ástæður í fundargerð; verkefnið kallaði á umfangsmiklar lóðaframkvæmdir, breytingar á aðal- og deiliskipulagi og þá lá ekki fyrir hver umhverfisáhrif af starfseminni yrðu.

Spurður um umhverfisþáttinn segir Bjarni Th. Bjarnason, sveitarstjóri Dalvíkurbyggðar, að varla geti mikið verið að baki þeim áhyggjum stjórnarmanna Faxaflóahafna í ljósi starfseminnar sem þar er fyrir. Umhverfismálin væru ekki áhyggjuefni enda mikil áhersla lögð á umhverfisvæna og örugga starfsemi, eins og komið hefði fram í máli forsvarsmanna fyrirtækisins frá upphafi.