Færir munaðarlausum börnum bókasafn

„Mér fannst eitthvað bogið við hvernig fordómar fá að grassera. Hér er gert grín að heyrnarlausum til dæmis og margt fleira í þeim dúr,“ segir Jana Ármannsdóttir, sjálfboðaliði í Úganda.

Hún hóf nýverið söfnun á fésbókarsíðunni sinni þar sem hún greindi frá að hana langaði að koma á fót bókasafni fyrir börnin. Bað hún þá fimm hundruð og átján vini sína að leggja til fimmtíu krónur og þá væri hægt að gera stórgott safn handa börnunum.

Með sanni má segja að söfnunin hafi undið upp á sig, en áður en hún vissi höfðu safnast um eitt hundrað þúsund íslenskra króna á reikninginn hennar. „Ég átti engan veginn von á að þetta myndi ganga svona vel. Fólk sem ég þekki ekki neitt var duglegt að leggja söfnuninni lið.“ Raunar gekk söfnunin svo vel að til er fyrir bókunum og því sem þarf til að gera rýmið upp. 

„Ég vildi koma upp safni bóka sem hafa boðskap og geta kennt börnunum umburðarlyndi, virðingu og svoleiðis, á sama tíma og þau læra ensku,“ segir Jana og bætir við að hún standi í ströngu við að koma þessu á koppinn þökk sé gjafmildum Íslendingum. 

Hún segir börnin afar spennt fyrir bókasafninu og reyna að hjálpa eftir bestu getu. Það verði hins vegar ekki sagt um fullorðna fólkið sem þyki hún fullfrökk. „Sumum finnst ég ekki eiga að vera að þessu og eiga að fara heim. Ég finn vissulega fyrir fordómum vegna þess að ég er hvít,“ segir hún, þó hvergi bangin og spennt fyrir að hafa áhrif til lengri tíma.