Holtavörðuheiðin opnuð á ný

Búið er að opna veginn um Holtavörðuheiðina að nýju en heiðin var lokuð í gærkvöldi. 

Djúpvegur nr. 61 rétt fyrir sunnan Hólmavík er nú lokaður þar sem vegurinn er í sundur. Sami vegur er líka í sundur yst í Staðardalnum, við gatnamót Djúpvegar og Drangsnesvegar. Þetta kemur fram í tilkynningu frá Vegagerðinni.

Vegfarendur eru varaðir við miklum vatnavöxtum í dag, vatn getur farið yfir veg þar sem ræsi hafa ekki undan.

Vegir á Suður- og Vesturlandi eru að mestu greiðfærir þó er eitthvað um hálkubletti í uppsveitum Suðurlands. Vegurinn um Holtavörðuheiði er nú lokaður þar sem vatn flæðir yfir veginn en hægt er að fara Bröttubrekku og Laxárdalsheiði.

Á Vestfjörðum eru vegir að verða auðir en snjóþekja er á Þröskuldum. Óveður er á Mikladal og Hálfdán en þar er líka krapi á vegi. Stórt skarð myndaðist á vegi 61 við Skeljavík og er reiknað með að viðgerð gæti tekið töluverðan tíma.

Vegir eru víða greiðfærir á Norðurlandi en þó er eitthvað um hálkubletti. Óveður á Mývatns- og Möðrudalsöræfum.

Á Austurlandi er víða orðið greiðfært en þó eru enn hálkublettir á stöku stað. Greiðfært er einnig  að mestu með suðausturströndinni en óveður er á Hvalnesi.

Undanfarna daga hefur hópur af hreindýrum verið við veg á milli Reyðarfjarðar og Eskifjarðar og eru vegfarendur beðnir að sýna aðgát.