Eldgamlar ofurhetjur mala gull

Þeir voru ekki margir íslensku unglingarnir sem sökktu sér niður í ofurhetjublöð á níunda áratug síðustu aldar. Blöðin voru bundin við þröngan aldurshóp ungra drengja en nokkrir þeirra misstu þó aldrei áhugann. Einn þeirra var Gísli Einarsson, framkvæmdastjóri Nexus, sem hefði vafalaust aldrei trúað því ef einhver hefði sagt honum á þessum tíma að aldarfjórðungi síðar yrðu flestar aðsóknarmestu kvikmyndir Hollywood byggðar á þessum sömu ofurhetjum.

Annað hefur þó komið á daginn og kvikmyndaárið 2015 verður engin undantekning og sneisafullt af hugrökkum ofurhetjum, skelfilegum illmennum og ævintýralegum söguþráðum. „Á þessum árum voru ofurhetjublöð frá útgáfufyrirtækjunum Marvel og DC fáanleg í bókabúðum. Fljótlega gerðist ég áskrifandi að nokkrum Marvel-titlum sem voru sendir heim pakkaðir inn í brúnan pappír og oft illa farin eftir ferðina yfir hafið.” Á þessum árum voru X-Men í miklu uppáhaldi Gísla en einnig Hulk, Spider-Man og Fantastic Four.

Margar af vinsælustu Hollywood-myndunum undafarinn áratug hafi verið sóttar í smiðju gömlu ofurhetjublaðanna en þó er stutt síðan kvikmyndaborgin tók við sér. „Það er ekki fyrr en árið 1978 sem fyrsta alvöru ofurhetjumyndin er gerð en það var Superman sem þá var orðinn 40 ára gamall.“ Vendipunkturinn hjá Marvel verður árið 1998 þegar fyrsta kvikmyndin um vampírubanann Blade kemur út. Í kjölfarið kom fyrsta X-Men-myndin árið 2000 og þar með var boltinn farinn að rúlla.“

Á þessum árum var Marvel búið að selja þremur kvikmyndaverum réttinn á mismunandi ofurhetjum og mismikil ánægja ríkti um þá ákvörðun innanhúss. „Því var ákveðið að taka þær persónur sem þeir áttu eftir og framleiða eigin kvikmyndir. Um leið voru persónurnar tengdar allar saman þannig að atburðir í einni mynd hefðu áhrif á aðrar, svipað og þeir gerðu í blöðunum með góðum árangri. Þetta er upphafið að núverandi gullöld Marvel-myndanna sem byrjaði með Iron Man árið 2008 og ekki sér fyrir endann á í dag.“

Kvikmyndaárið fram undan verður fjörugt fyrir unnendur ofurhetjumynda eins og Gísla. Hann segist hafa gaman af öllum góðum bíómyndum en sci-fi-, fantasíu- og teiknimyndir séu það sem hann sækir fyrst og fremst í. „Það er allt of langt mál að telja upp þær myndir sem ég er spenntur fyrir. Þó má nefna þrjár ofurhetjumyndir; Avengers 2: Age of Ultron og Ant Man frá Marvel auk Fantastic Four-endurgerðar frá Fox. Svo er ein klassísk fantasíumynd með dreka- og dýflissusniði, Seventh Son, sem lítur vel út. Samt er ein mynd sem drottnar yfir þeim öllum á þessu ári og ég bíð eftir henni með jöfnu magni eftirvæntingar og kvíða. Það er auðvitað jólamyndin Star Wars Episode VII: The Force Awakens. Hún má ekki klikka!“

Landsmenn mega því búast við holskeflu rándýrra ofurhetjumynda næstu árin. „Mér finnst auðvitað stórsniðugt að hasarblöðin sem ég og ekki svo margir aðrir á Íslandi vorum að lesa fyrir 30 árum séu orðin undirstaðan að bróðurparti tekna Hollywood og að þessar rúmlega 50 ára gömlu ofurhetjur séu ferskar og nýjar fyrir bíóáhorfendum.“